މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން ވެލާނާ އިންޓަނޭޝަނަލް އެއަރޕޯޓުގެ އައު ޕެސެންޖަރ ޓާމިނަލް 26 ޖުލައި 2025 ގައި ހުޅުވުމަށް ތައްޔާރުވަމުންދާއިރު، ސްޓޭކްހޯލްޑަރުން ޓާމިނަލް އަށް ފަރިތަކުރުމުގެ ޕްރޮގްރާމެއް ފަށައިފިއެވެ.
މި ޕްރޮގްރާމްގެ މައިގަނޑު މަޤްޞަދަކީ ސްޓޭކްހޯލްޑަރުންނަށް އައު ޓާމިނަލްގައި ޗެކް-އިން އޭރިއާތަކާއި، ފަސިންޖަރުން ދަތުރުކުރާނެ މަގުތަކާއި، ބޯޑިންގ ގޭޓްތައް ހިދުމަތްދޭނެ ގޮތްތަކާއި މެދު މައުލޫމާތު ފޯރުކޮށްދިނުމެވެ. އެމް.އޭ.ސީ.އެލްއިން ބުނެފައިވާ ގޮތުގައި މިކަމުގެ ސަބަބުން ޓާމިނަލް ހުޅުވޭ ދުވަހުން ފެށިގެން އޮޕަރޭޝަންތައް އޮމާންކަމާއެކު ކުރިއަށް ގެންދިޔުމަށް މަގުފަހިވާނެކަމަށް އުންމީދުކުރެވެއެވެ.
The New Passenger Terminal familiarization tour continued today with Island Aviation. Key areas highlighted during the visit included understanding passenger flow and becoming familiar with the facilities to ensure smoother airline operations. pic.twitter.com/fwN3tSPMfd
— Maldives Airports Company Ltd (@MACLmedia) June 16, 2025
އައު ޓާމިނަލަކީ ދިވެހިރާއްޖޭގެ ވައިގެ ބަނދަރަށް ގެނެވޭ ބޮޑު ކުރިއެރުމެކެވެ. މި ޓާމިނަލްގައި އަހަރަކު 7.5 މިލިއަން ފަސިންޖަރުންނަށް ޚިދުމަތް ދެވޭނެ ކަމަށް އަންދާޒާކޮށްފައިވެއެވެ. އަދި އޭރޯ-ބްރިޖްތަކާއި، އޮޓޮމޭޓެޑް ބެގޭޖް ސިސްޓަމްތަކާއި، ސެލްފް-ޗެކް-އިން ކިއޮސްކްތަކާއި، ލައުންޖްތައް ހިމެނޭނެކަމަށް އެމް.އޭ.ސީ.އެލްއިން ބުނެފައިވެއެވެ.
އެމް.އޭ.ސީ.އެލްއިން ޖުލައި މަހުން ފެށިގެން މަރުޙަލާތަކަކަށް ބަހާލައިގެން އެއަރލައިންތައް އައު ޓާމިނަލަށް ބަދަލުކުރަމުން ގެންދަން ވަނީ ނިންމާފައިއެވެ. އެ ކުންފުނީގެ މަޤްޞަދަކީ މި އަހަރުގެ ފަހު ކޮޅު ފެށޭ ޓޫރިސްޓް ސީޒަނަށް ހުރިހާ އެއަރލައިނެއް އައު ޓާމިނަލަށް ބަދަލުކުރުމެވެ.
