ފަރަންސޭސިވިލާތުން ރާއްޖެއަށް ޒިޔާރަތްކުރި ފަތުރުވެރިންގެ ޢަދަދު ބައިލައްކައަށް އަރާފައިވާކަން ފަތުރުވެރިކަމާއި ތިމާވެއްޓާ ބެހޭ ވުޒާރާގެ ތަފާސްހިސާބުތަކުން ހާމަވެއްޖެއެވެ.
މިއީ، ރާއްޖެއަށް ފަތުރުވެރިން ގެނެސްދޭ ޤައުމުތަކުގެ ތެރެއިން 8 ވަނައަށް އެންމެ ގިނަ ފަތުރުވެރިން ގެނެސްދޭ ޤައުމެވެ. މިހާތަނަށް މުޅި ޖުމްލަ 1.9 މިލިޔަނަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، ސަރުކާރުގެ 2.3 މިލިޔަން ފަތުރުވެރިންގެ އަމާޒު ހާސިލުވުމާ މިވަނީ ވަރަށް ގާތަށް އައިސްފައެވެ.
ފަތުރުވެރިކަމާއި ބެހޭ ވުޒާރާއިން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން، މިމަހުގެ 22 ވަނަ ދުވަހުގެ ނިޔަލަށް ފަރަންސޭސިވިލާތުން ރާއްޖެއަށް 50،282 ފަތުރުވެރިން ވަނީ، ޒިޔާރަތްކޮށްފައެވެ. މިއީ، މިއަހަރު ރާއްޖެއަށް ޒިޔާރަތްކުރި ފަތުރުވެރިންގެ ޖުމްލަ ޢަދަދުގެ 2.6 އިންސައްތައެވެ.
މިއަހަރުގެ މިހާތަނަށް ރާއްޖެއަށް ޖުމްލަ 1,969,726 ފަތުރުވެރިން ޒިޔާރަތްކޮށްފައިވެއެވެ. މި ޢަދަދަކީ، މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކުރި 1,790,268 ފަތުރުވެރިންނާ އަޅާ ބަލާއިރު، 10 އިންސައްތަ އިތުރު ޢަދަދެކެވެ.
މިމުއްދަތުގެ ތެރޭގައި ރާއްޖެއަށް އެންމެ ގިނައިން ފަތުރުވެރިން އައި 5 ޤައުމު:
- ޗައިނާ: 307,722 ފަތުރުވެރިން
- ރަޝިއާ: 248،308 ފަތުރުވެރިން
- އިނގިރޭސިވިލާތް: 175،874 ފަތުރުވެރިން
- ޖަރުމަނުވިލާތް: 148،612 ފަތުރުވެރިން
- އިޓަލީވިލާތް: 128،286 ފަތުރުވެރިން
މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ ތެރެއިން އެންމެ ގިނައިން ފަތުރުވެރިން ޗުއްޓީ ހޭދަކޮށްފައިވަނީ، ރިސޯޓުތަކުގައެވެ. އެއީ، ޖުމްލަ ފަތުރުވެރިންގެ 73.6 އިންސައްތައެވެ. ދެވަނައަށް އެންމެ ގިނަ ފަތުރުވެރިން ޗުއްޓީ ހޭދަކުރީ، ގެސްޓްހައުސްތަކުގައެވެ. އެއީ، 21.5 އިންސައްތަ ފަތުރުވެރިންނެވެ.
ސަރުކާރުން މިއަހަރަށް އަމާޒު ހިފާފައިވަނީ، ރާއްޖެއަށް 2.3 މިލިޔަން ފަތުރުވެރިން ގެނައުމަށެވެ. މިހާތަނަށް ރާއްޖެއަށް 2 މިލިޔަން ފަތުރުވެރިން އައުމާ ގާތްވެފައިވާއިރު، މި އަމާޒު ހާސިލުކުރުމަށް ދެން ބޭނުންވަނީ، 3 ލައްކައެއްހާ ފަތުރުވެރިންނެވެ. ރާއްޖެއަށް މިހާރު އެވްރެޖުކޮށް ދުވާލެއްގެ މައްޗަށް 6000 އަށްވުރެ ގިނަ ފަތުރުވެރިން ޒިޔާރަތްކުރެއެވެ. މިހާރގެ މި ޓްރެންޑް ދެމިގެންދާނަމަ، ސަރުކާރުގެ އަމާޒު ފަސޭހައިން ހާސިލުވެގެންދާނެކަމަށް ލަފާކުރެވެއެވެ.
