ކާސްޓަވޭ މޯލްޑިވްސް ޕްރައިވެޓް ލިމިޓެޑުން ނަގާފައިވާ ލޯނެއްގެ ފައިސާ އަނބުރާ ހޯދުމަށް، ބޭންކް އޮފް ސިލޯންއިން ދެކުނު އަރިއަތޮޅުގައި އޮންނަ 5 ތަރީގެ ޑްރިފްޓް ތެލުވެލިގާ ރިޓްރީޓްގެ ހެޑް ލީޒްހޯލްޑް ހައްގު ވިއްކާލަން ނިންމައިފިއެވެ. މި ރިސޯޓް ވިއްކާލުމަށް ސިވިލް ކޯޓުން ވަނީ ހުއްދަ ދީފައެވެ.
މި ރިސޯޓަކީ 30 ވިލާ ހިމެނޭ ރިސޯޓެކެވެ. ބޭންކް އޮފް ސިލޯންއިން މި ރިސޯޓް ވިއްކާލަން ހަމަޖައްސާފައި ވަނީ ކްލޯސްޑް ޓެންޑަރ އުސޫލުންނެވެ. ބޭންކުން ބުނި ގޮތުގައި މި ރިސޯޓްގެ ލީޒް މުއްދަތު 2064 ވަނަ އަހަރުގެ އެޕްރީލް މަހު ހަމަވާނެ ކަމަށާއި، ކާމިޔާބުވާ ފަރާތަކަށް ފަތުރުވެރިކަމުގެ ގާނޫނާ އެއްގޮތަށް އިތުރު 49 އަހަރަށް ލީޒް މުއްދަތު ދިގުދައްމާލުމުގެ ފުރުސަތު ލިބޭނެއެވެ.
މި ޓެންޑަރަށް ހުށަހަޅާނެ އެންމެ ކުޑަ އަގަކަށް ބޭންކުން ކަނޑައަޅާފައި ވަނީ 9.9 މިލިއަން އެމެރިކާ ޑޮލަރެވެ. ޓެންޑަރގައި ބައިވެރިވާން ބޭނުންވާ ފަރާތްތަކުން ކުންފުނި ރަޖިސްޓްރީގެ ލިޔުންތައް، ބޯޑު ރިޒޮލިއުޝަން އަދި ބަދަލުގައި ހާޒިރުވާ ފަރާތުގެ އައިޑެންޓިޓީ ކާޑުގެ ކޮޕީ ހުށަހަޅަން ޖެހޭނެއެވެ.
ޓެންޑަރ ޑޮކިއުމެންޓްސް ހޯދުމަށް 5,000 އެމެރިކާ ޑޮލަރުގެ ނޮން-ރިފަންޑަބަލް ފީއެއް ދައްކަން ޖެހޭނެއެވެ. މީގެ އިތުރުން 25,000 އެމެރިކާ ޑޮލަރުގެ ޑިޕޮޒިޓެއް ހުށަހަޅަން ޖެހޭނެ ކަމަށާއި، ޓެންޑަރ ހުށަހެޅުމަށްފަހު ފަސްޖެހިއްޖެނަމަ ނުވަތަ ފައިސާ ދައްކަން ކަނޑައަޅާފައިވާ މުއްދަތުގައި ދައްކާފައި ނުވާނަމަ މި ޑިޕޮޒިޓް ބޭންކަށް ނަގާނެ ކަމަށް ވެސް ބުނެފައިވެއެވެ. ޓެންޑަރ ހުށަހަޅާ ފަރާތްތަކުގެ ހާޒިރުގައި އެޕްލިކޭޝަންތައް ހުޅުވުން އޮންނާނީ ބޭންކް އޮފް ސިލޯންގެ މާލޭ ގޮފީގައެވެ.
ޓެންޑަރ ކާމިޔާބުކުރާ ފަރާތުން، އެވޯޑް ދިން ދުވަހުން ފެށިގެން 30 ދުވަހުގެ ތެރޭގައި ޓެންޑަރ އަގުގެ 25 އިންސައްތަ ދައްކަން ޖެހޭނެއެވެ. އަދި ފުރިހަމަ ފައިސާ 60 ދުވަހުގެ ތެރޭގައި ދައްކަން ޖެހޭނެއެވެ. ކާމިޔާބުކުރާ ފަރާތުން ފައިސާ ދެއްކުމަށް ނާކާމިޔާބުވެއްޖެނަމަ، ދެވަނަ އަށް އެންމެ މަތީ އަގެއް ހުށަހަޅާފައިވާ ފަރާތަށް މި ފުރުސަތު ލިބޭނެއެވެ. މި ރިސޯޓާ ގުޅުންހުރި ކޮންމެ ބާވަތެއްގެ ފައިސާއެއް، ޓެކްސް، ނުވަތަ ސަރުކާރަށް ދައްކަންޖެހޭ އެހެނިހެން ފީތައް ވިއްކައިގެން ލިބޭ ފައިސާއިން ކެނޑޭނެއެވެ.
ޓެންޑަރ ޑޮކިއުމެންޓްސް 2026 ވަނަ އަހަރުގެ ޖެނުއަރީ 7 ވަނަ ދުވަހުގެ ނިޔަލަށް ދޫކުރާނެއެވެ. އަދި އެޕްލިކޭޝަން ހުށަހެޅުމުގެ އެންމެ ފަހު ތާރީޚަކީ 2026 ވަނަ އަހަރުގެ ޖެނުއަރީ 8 ވަނަ ދުވަހުގެ 14:00 އެވެ.
