ދެކުނު އޭޝިއާ ސަރަހައްދުގެ އެއްބާރުލުން ދިރުވައި އާލާކުރުމުގެ މުހިންމުކަން ފާހަގަކުރައްވައި، ސައުތު އޭޝިއަން އެސޯސިއޭޝަން ފޯ ރީޖަނަލް ކޯޕަރޭޝަން (ސާކް) ޗާޓަރުގެ 40 އަހަރު ފުރުމުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ސާކްގެ ސެކްރެޓަރީ ޖެނެރަލަށް މެސެޖެއް ފޮނުއްވައިފިއެވެ. ސާކް ޗާޓަރ ދުވަސް ކޮންމެ އަހަރެއްގެވެސް ޑިސެމްބަރު މަހުގެ 8 ވަނަ ދުވަހު ފާހަގަކުރެވެއެވެ.
ރައީސުލްޖުމްހޫރިއްޔާގެ މެސެޖުގައި ވަނީ، މި ސަރަހައްދީ ޖަމްޢިއްޔާއަށް އަލުން ދިރުމެއް ގެނައުމަށްޓަކައި، ގައުމުތަކުގެ ދެމެދުގައި އިތުބާރު އަލުން ބިނާކޮށް، ސާކް ސަމިޓް ބާއްވައިގެން ކުރިއަށް ދިއުމަކީ ކޮންމެހެން ކުރަންޖެހޭ ކަމެއްކަމަށް ފާހަގަކުރައްވާފައެވެ. އަދި ދެކުނު އޭޝިއާ ސަރަހައްދުގެ ޤާބިލުކަން އިތުރުކޮށް، ސަރަހައްދުގެ ރައްޔިތުންގެ ތަނަވަސްކަން އިތުރުކުރުމަށްޓަކައި، ގައުމުތަކުގެ ދެމެދުގައި މަޝްވަރާއާއި އެއްބަޔަކު އަނެއްބަޔަކަށް އެއްބާރުލުން ދިނުމުގެ މުހިންމުކަމަށް ރައީސް ވަނީ ބާރުއަޅުއްވާފައެވެ.
ރައީސްގެ މެސެޖްގައި އިތުރަށް ބަޔާންކުރައްވާފައި ވަނީ، ދުނިޔޭގައި އަދި ސަރަޙައްދީ ގޮތުން ކުރިމަތިވެފައިވާ އެތައް ގޮންޖެހުންތަކެއް ހައްލުކުރުމަށްޓަކައި، ގައުމުތަކުގެ އެއްބާރުލުން މުހިންމުކަމަށެވެ. އެގޮތުން މޫސުމަށް އަންނަ ބަދަލުތަކަށް ކުރިމަތިލުމާއި، އިއާދަކުރަނިވި ހަކަތައިގެ ދާއިރާ ކުރިއެރުވުމަށާއި، އާންމު ޞިއްޙަތުގެ ނިޒާމުތައް ހަރުދަނާކުރުން ފަދަ ކަންކަން އެމަނިކުފާނު ފާހަގަކުރެއްވިއެވެ. މީގެއިތުރުން ކާބޯތަކެތީގެ ރައްކާތެރިކަން ކަށަވަރުކުރުމާއި، ސަރަހައްދުގައި ނުތަނަވަސްކަން ކުޑަކުރުމާއި، އިޤްތިޞާދީ ތަރައްޤީ ކުރިއެރުވުން ފަދަ ކަންކަން ހިމެނޭކަން ރައީސް ވަނީ ފާހަގަކުރައްވާފައެވެ.
މީގެ އިތުރުން ރައީސް ވިދާޅުވީ، ސާކްގެ ތެރޭގައި މުއައްސަސާތަކުގެ އޮނިގަނޑެއް ހަރުދަނާ ކުރުމުގެ ސަބަބުން، މިފަދަ ގޮންޖެހުންތަކާ ދެކޮޅަށް މަސައްކަތް ކުރުމާއި، ސަރަހައްދުގެ ރައްޔިތުންނަށް ރަނގަޅަށް ޚިދުމަތް ދިނުމަށް މަގުފަހިވާނެކަމަށެވެ. ރައީސުލްޖުމްހޫރިއްޔާގެ މެސެޖު ނިންމަވާލެއްވީ، މުޅި ސަރަހައްދުގައި ދެމިއޮންނަ ސުލްހައާއި ހަމަޖެހުމާއި ތަނަވަސްކަމަށް މާނަހުރި ގޮތެއްގައި މަސައްކަތް ކުރާ އަދި ކުރިއަށް ވިސްނާ ސާކެއް އުފެއްދުމަށް ރާއްޖެއިން ދެމިއޮންނާނެކަމުގެ ޔަޤީންކަން ދެއްވަމުންނެވެ.
