އޮސްޓްރޭލިއާއިން 16 އަހަރުން ދަށުގެ ޒުވާނުންނަށް ސޯޝަލް މީޑިއާ މަނާކުރުމުން، ޔޫރަޕިއަން ޔޫނިއަންގެ ގައުމެއް ކަމަށްވާ ޑެންމާކުން ވެސް އެފަދަ ބަދަލެއް ގެނައުމަށް ތައްޔާރުވަމުން އެބަދެއެވެ. ޑެންމާކު ސަރުކާރުން މިދިޔަ ދުވަސްތަކުގައި ވަނީ 15 އަހަރުން ދަށުގެ އިންޓަނެޓް ބޭނުންކުރާ ފަރާތްތަކަށް ސޯޝަލް މީޑިއާގެ ހުއްދަ ހަނިކުރުމުގެ ރާވާފައިވާ ކަމަށް އިއުލާންކޮށްފައެވެ. މިއީ ޔޫރަޕިއަން ޔޫނިއަންގައި ޒުވާނުން ސޯޝަލް މީޑިއާ ބޭނުންކުރާ މިންވަރު ހަނިކުރުމަށް އެޅޭ މުހިންމު ފިޔަވަޅެކެވެ.
މިހާރު މި ގާނޫނަކީ ހުށަހެޅުމެއްގެ ގޮތުގައި އޮތް ނަމަވެސް، މި ހުށަހެޅުމަށް ސަރުކާރުގެ އިތުރުން އިދިކޮޅު ފަރާތްތަކުން ވެސް ތާއީދު ވަނީ ލިބިފައެވެ. މި ހުށަހެޅުން ފާސްވެއްޖެނަމަ، 2026 ވަނަ އަހަރުގެ ނިޔަލަށް މި ގާނޫނަށް އަމަލުކުރަން ފެށިދާނެ ކަމަށް ބެލެވެއެވެ. މި ހަނިކުރުން އޮތް ނަމަވެސް، 13 އަހަރާއި އެއަށްވުރެ މަތީ އުމުރުގެ ކުދިންނަށް މައިންބަފައިންގެ ހުއްދައާއެކު ސޯޝަލް މީޑިއާ ބޭނުންކުރެވޭނެ ކަމަށް ލަފާކުރެވެއެވެ. ނަމަވެސް 13 އަހަރުން ދަށުގެ ކުދިންނަށް ސޯޝަލް މީޑިއާ ޕްލެޓްފޯމްތަކުގައި އެކައުންޓް ހެދުމުގެ ހުއްދައެއް ނުލިބޭނެއެވެ.
ޑެންމާކުގައި 13 އަހަރުން ދަށުގެ 98% ކުދިން މިހާރު ވެސް ސޯޝަލް މީޑިއާ އެކައުންޓްތައް ބޭނުންކުރާ ކަމަށް ރިޕޯޓްތަކުން ދައްކައެވެ. މިއީ މި ގާނޫނު ތަންފީޒު ކުރުމުގައި ގޮންޖެހުންތަކެއް ހުރިކަން ހާމަކުރާ ކަމެކެވެ.
ޑެންމާކުގެ ޑިޖިޓަލް ކަންކަމާ ބެހޭ ވަޒީރު ކެރޮލައިން ސްޓޭޖް ވިދާޅުވީ، ހަގީގީ ދުނިޔޭގައި ވެސް އުމުރަށް ބިނާކޮށް ހުއްދަތަކާއި ހަނިކުރުންތައް ހުންނަ ފަދައިން، ޑިޖިޓަލް ދުނިޔޭގައި ވެސް ބެލެހެއްޓުމާއި ސުޕަވައިޒް ކުރުން މުހިންމު ކަމަށެވެ. ޑިޖިޓަލް ދުނިޔޭގައި ”ބޮޑީގާޑެއް“ ނުހުންނަކަން ފާހަގަކުރައްވައި، ކަނޑައެޅިގެން ރެގިއުލޭޝަންތައް ހުރުން މުހިންމުކަން ވަޒީރު ވަނީ ފާހަގަކުރައްވާފައެވެ.
މި ބަދަލާއެކު ޒުވާނުންނަށް އެމީހުންގެ އޮންލައިން ރަހުމަތްތެރިންނާ ގުޅުން ކެނޑިދާނެ ކަމަށް ބައެއް ކަންބޮޑުވުންތައް ފާޅުކޮށްފައިވީ ނަމަވެސް، ގިނަ މައިންބަފައިން ވަނީ މި ފިޔަވަޅަށް ތާއީދުކޮށްފައެވެ. މި ގާނޫނަށް ފުރިހަމައަށް އަމަލުކުރުމަށްޓަކައި، އުމުރު ހަމަވޭތޯ ކަށަވަރުކުރުމަށްޓަކައި ޑިޖިޓަލް އެވިޑެންސް އެޕެއް ތައާރަފްކުރުމަށް ޑެންމާކުން ރާވާފައިވެއެވެ.
