މާލޭގެ މުނިސިޕަލް ޚިދުމަތްތައް ހުޅުމާލެއަށް ބަދަލުކުރުމުގައި ދިމާވެފައިވާ ލަސްތަކާއި ގުޅޭގޮތުން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ދެއްކެވި ވާހަކަފުޅަކަށް މާލޭގެ މޭޔަރު އާދަމް އާޒިމް ރައްދު ދެއްވުމާ ގުޅިގެން، ރައްޔިތުންނަށް އޮޅުވާލައްވަމުން ގެންދަވާ ކަމަށް ޑެޕިއުޓީ މޭޔަރު މުޙައްމަދު ޢަރީޝް ވަރުގަދަ ރައްދެއް ދެއްވައިފިއެވެ.
މިކަމާ ގުޅޭގޮތުން ރައީސް މުޢިއްޒު ވާހަކަފުޅު ދެއްކެވީ ހުޅުމާލެ ފޭސް 1 ގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ. ރައީސް ވިދާޅުވީ، މާލޭ ސިޓީ ކައުންސިލުން ޒިންމާ ނުނަގައި ކަމަށް ވާތީ، ހުޅުމާލޭގެ މުނިސިޕަލް ޚިދުމަތްތައް އަދިވެސް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ދެމުންދާ ކަމަށެވެ. ރައީސް ފާހަގަކުރެއްވީ، 2023 ވަނަ އަހަރުގެ ޑިސެމްބަރު މަހުގެ 31 ވަނަ ދުވަހު ރިޔާސީ އަމުރެއް ނެރެ، އެމަނިކުފާނުގެ ރިޔާސީ ވައުދާ އެއްގޮތަށް ޚިދުމަތްތައް ހަވާލުކުރަން އަންގާފައިވީ ނަމަވެސް، ކައުންސިލް އަދިވެސް މި މަސްއޫލިއްޔަތު ބަލައިގަތުމަށް ތައްޔާރުނުވާ ކަމަށެވެ.
ރައީސުލްޖުމްހޫރިއްޔާގެ މިވާހަކަފުޅަށް ރައްދު ދެއްވައި މޭޔަރު އާދަމް އާޒިމް އެކްސް ގައި ކުރެއްވި ޕޯސްޓެއްގައި ވަނީ ރައީސްގެ ވާހަކަފުޅު ދޮގުކުރައްވާފައެވެ. މޭޔަރު ވިދާޅުވީ ޚިދުމަތްތައް ބަދަލުކުރުމުގެ މުޅި މަސައްކަތުގައި ސިޓީ ކައުންސިލުން އެއްބާރުލުން ދީފައިވާ ކަމަށެވެ. އަދި 2024 ވަނަ އަހަރުގެ ޖެނުއަރީ މަހުން ފެށިގެން 2025 ވަނަ އަހަރުގެ ސެޕްޓެމްބަރު މަހާ ހަމައަށް ބާއްވާފައިވާ ބައްދަލުވުންތަކާއި، ސިޓީ ކައުންސިލުން ފޮނުވާފައިވާ ސިޓީތަކާއި، ކުރެވިފައިވާ މަޝްވަރާތައް ފާހަގަކުރައްވައި، ލަސްވުންތަކުގެ ސަބަބަކީ ރައީސުލްޖުމްހޫރިއްޔާގެ ފަރާތުން ކަންތައްތައް ނުކުރެވުން ކަމަށް މޭޔަރު ވިދާޅުވިއެވެ.
މޭޔަރުގެ މިވާހަކަފުޅަށް ޑެޕިއުޓީ މޭޔަރު މުހައްމަދު އާރިޝް ވަގުތުން ރައްދު ދެއްވަމުން ވިދާޅުވީ، މޭޔަރު ދެއްވި ރައްދުގައި މައްސަލައިގެ އަސްލަށް އެއްވެސް އިޝާރާތެއް ކޮށްފައި ނުވާ ކަމަށެވެ. ޢަރީޝް ވިދާޅުވީ، ޚިދުމަތްތައް ބަދަލުކުރުމަށް ސިޓީ ކައުންސިލްގެ ތެރެއިން އެއްވެސް ފަހަރަކު ރަސްމީ ވޯޓެއް ނުނަގާ ކަމަށާއި، ކައުންސިލް ތައްޔާރަށް ހުރި ކަމަށް އާންމުންނަށް ދައްކާ ހުރިހާ ވާހަކަތަކަކީ ގާނޫނީ ގޮތުންނާއި އިޖުރާއީ ގޮތުން ބަލާއިރު އެއްވެސް ބުރަދަނެއް ނެތް ވާހަކަތަކެއް ކަމަށެވެ.
”މޭޔަރު މިކަން ކައުންސިލްގެ ވޯޓަކަށް ހުށަހަޅާފައެއް ނުވޭ،“ މުޙައްމަދު ޢަރީޝް ވިދާޅުވިއެވެ.
ކައުންސިލްގެ ތާއީދަކާ ނުލައި ހުޅުމާލޭގެ މުނިސިޕަލް ޚިދުމަތްތަކުގެ ޒިންމާ ނެގުމަށް ގާނޫނީ އެއްވެސް ބުރަދަނެއް ނެތް. މުޙައްމަދު ޢަރީޝް
ޑެޕިއުޓީ މޭޔަރު ހާމަކުރެއްވީ، ބައްދަލުވުންތަކާއި ސިޓީތަކާ ބެހޭގޮތުން ތަކުރާރުކޮށް ވާހަކަ ދެއްކެވި ނަމަވެސް، އެއްވެސް އަމަލީ ނުވަތަ ފިޔަވަޅެއް އަޅާފައިނުވާ ކަމަށެވެ. ޢަރީޝް ވިދާޅުވީ، ޚިދުމަތްތައް ހަވާލުކުރުމަށްޓަކައި އެއްވެސް އޮޕަރޭޝަނަލް ފްރޭމްވޯކެއް ފާސްކޮށްފައި ނުވާ ކަމަށާއި، ބަޖެޓެއް ރަސްމީކޮށް ބަލައިގެންފައި ނުވާ ކަމަށާއި، މިހާރު އެޗްޑީސީން ދެމުންދާ ޚިދުމަތްތައް ކައުންސިލަށް ހަވާލުކުރުމަށް އެއްވެސް މެންޑޭޓެއް ހޯދާފައި ނުވާ ކަމަށެވެ.
މޭޔަރު މިކަން ވަރަށް ބޮޑަށް އޮޅުވާލައްވާތީ ހިތާމަކުރަން. ހުޅުމާލެ މުނިސިޕަލް ޚިދުމަތްތަކާ ސިޓީ ކައުންސިލުން ޙަވާލުވުމާމެދު ގޮތެއް ނިންމަން މޭޔަރު އާދަމް ޢާޒިމް ކައުންސިލުގައި ވޯޓެއް ނަންގަވާފައެއް ނެތް. ކައުންސިލުގެ ވޯޓަކަށް ނާއްސަވާ މޭޔަރު މިކަން ކުރައްވާނެ ގާނޫނީ ގޮތަކީ…
— Mohamed Areesh (@attuareesh) December 22, 2025
މޭޔަރު މިމައްސަލަ ބޭނުންކުރައްވަނީ ރަނގަޅު ގަވަނަންސެއް ގާއިމުކުރުމަށްވުރެ ބޮޑަށް ސިޔާސީ މެސެޖެއް ދިނުމަށް ކަމަށް އާރިޝް ތުހުމަތުކުރެއްވިއެވެ. އަދި އާންމުންނަށް ފެންނަމުންދާ ވާހަކަތަކަކީ ރައްޔިތުންނަށް ގަސްތުގައި އޮޅުވާލުމުގެ މަސައްކަތެއް ކަމަށް އޭނާ ސިފަކުރެއްވިއެވެ. ރައީސުލްޖުމްހޫރިއްޔާ ސަރުކާރުން ޚިދުމަތްތައް ބަދަލުކުރުމަށް ތައްޔާރުކަން ހާމަކުރައްވާފައިވާ ކަމަށާއި، ކައުންސިލްގެ އެތެރޭގެ މަޝްވަރާތަކަށް އެނގޭ ގޮތުގައި މޭޔަރު އެފަދަ މަސައްކަތްތަކަށް ހެޔޮ ގޮތެއްގައި އިޖާބަ ދެއްވާފައި ނުވާ ކަމަށް ވެސް އާރިޝް އިތުރަށް ވިދާޅުވިއެވެ.
މާލޭ ސިޓީ ކައުންސިލުން ރަސްމީކޮށް ޚިދުމަތްތައް ބަލައިގަންނަންދެން، ހުޅުމާލޭގެ މުނިސިޕަލް ޚިދުމަތްތައް އެޗްޑީސީން ދެމުންދާނީ ވަގުތީ އުސޫލުންނެވެ. ޑެޕިއުޓީ މޭޔަރުގެ ރައްދާއެކު ސަރުކާރުގެ ބަސް ވަރުގަދަވެފައި ވާއިރު، މިކަމުގެ ޒިންމާ އޮތީ ކައުންސިލްގެ އިސްވެރިންގެ ބޮލުގައި ކަމަށް ސަރުކާރުން ދަނީ ބުނަމުންނެވެ.
