ނުކުޅެދުންތެރިކަން ހުންނަ ފަރާތްތައް ވަޒީފާގެ މާޙައުލަށް ތައްޔާރުކުރުމަށްޓަކައި މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުން ކުރިއަށްގެންދާ ”ޖޮބް ރެޑިނަސް“ ޕްރޮގްރާމްގެ ތިންވަނަ ބުރުގައި ބައިވެރިވުމުގެ ފުރުޞަތު މިއަދު ހުޅުވާލައިފިއެވެ.
މިއީ ނުކުޅެދުންތެރިކަން ހުންނަ ފަރާތްތަކަކީ މުޖުތަމަޢު ބަލައިގަންނަ، އަދި ހަމަހަމަ ފުރުޞަތުތަކެއް ލިބިފައިވާ ބަޔަކަށް ހެދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ދެއްވާ ޚާއްޞަ އިސްކަމުގެ ދަށުން ކުރިއަށްގެންދާ ޕްރޮގްރާމެކެވެ. މިދިޔަ ދެ އަހަރު ދުވަހުގެ ތެރޭގައި އެކި ދާއިރާތަކުން ނުކުޅެދުންތެރިކަން ހުންނަ 350 އަށްވުރެ ގިނަ ފަރާތްތަކަށް ވަނީ ވަޒީފާގެ ފުރުޞަތު ފަހިކޮށްދީފައެވެ.
ހަ މަސް ދުވަހުގެ މުއްދަތަށް ކުރިއަށްގެންދާ މި ޕްރޮގްރާމްގައި މައިގަނޑު ގޮތެއްގައި ކިޔަވައިދިނުމަށް ހަމަޖެހިފައިވަނީ ވަޒީފާގެ މާޙައުލުގައި އަމަލުތައް ބަހައްޓާނެ ގޮތާއި، އެހެން މީހުންނާ ގުޅިގެން މަސައްކަތް ކުރާނެ ގޮތްތަކެވެ. މީގެ އިތުރުން ނުކުޅެދުންތެރިކަން ހުންނަ ފަރާތްތަކުގެ ޙައްޤުތަކާއި، މަސައްކަތުގެ މާޙައުލަށް ބޭނުންވާ ޢާއްމު ހުނަރުތަކަށް ބައިވެރިން އަހުލުވެރިކުރުވުން މި ޕްރޮގްރާމްގެ ތެރެއިން ކުރިއަށްދާނެއެވެ.
ސަރުކާރުން އަންނަނީ ދައުލަތުގެ ކުންފުނިތައް މެދުވެރިކޮށް މިފަދަ ފަރާތްތަކަށް ވަޒީފާގެ ގިނަ ފުރުޞަތުތަކެއް ފަހިކޮށްދެމުންނެވެ. އެގޮތުން އެމްޕީއެލް، ސްޓެލްކޯ އަދި ސަރުކާރު ހިއްސާވާ އެހެނިހެން ކުންފުނިތަކުން ދަނީ އެކި ދާއިރާތަކުން ނުކުޅެދުންތެރިކަން ހުންނަ ފަރާތްތަކަށް ވަޒީފާ ދެމުންނެވެ.
އިޖުތިމާޢީ އަދި އާއިލީ ތަރައްޤީއާއި ބެހޭ ވުޒާރާއިން މަޢުލޫމާތު ދޭ ގޮތުގައި، މި ޕްރޮގްރާމްގައި ބައިވެރިވާން އެދޭ ފަރާތްތަކަށް އެ ވުޒާރާގެ ސޯޝަލް މީޑިއާ މަންސަތަކުގައި ޝާއިޢުކޮށްފައިވާ ލިންކް ނުވަތަ ކިއު އާރް ކޯޑް މެދުވެރިކޮށް ފޯމު ހުށަހެޅޭނެއެވެ.
މި ޕްރޮގްރާމްގައި ބައިވެރިވުމަށް އެދި ފޯމު ހުށަހެޅުމުގެ އެންމެ ފަހު ތާރީޚަކީ މި މަހުގެ 12 ވަނަ ދުވަހެވެ. ސަރުކާރުގެ އަމާޒަކީ މިފަދަ ޕްރޮގްރާމްތަކުގެ އެހީގައި ނުކުޅެދުންތެރިކަން ހުންނަ ކޮންމެ މީހަކީވެސް އަމިއްލަ ފައިމައްޗަށް ތެދުވެ، މުޖުތަމަޢުގައި އަބުރުވެރި ދިރިއުޅުމެއް އުޅޭ މީހަކަށް ހެދުމެވެ.
