ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ނަމުގައި އޮޅުވާލައިގެން އާންމުންގެ އަތުން މައުލޫމާތު ހޯދަމުންދާ މައްސަލަތަކެއް ފެންމަތިވެފައިވާތީ، އެކަމަށް ސަމާލުވުމަށް އެ ކުންފުނިން އިލްތިމާސްކޮށްފިއެވެ.
އެޗްޑީސީން މިއަދު ނެރުނު ބަޔާނެއްގައި ބުނީ، އެ ކުންފުނީގެ ނަމުގައި ވައިބަރ، އެސްއެމްއެސް އަދި އާދައިގެ ފޯނު ކޯލުތައް މެދުވެރިކޮށް އާންމުންނަށް ގުޅަމުންދާ ކަމުގެ ޝަކުވާ ލިބެމުންދާ ކަމަށެވެ. އަދި މި ފޯނު ކޯލުތަކާއި މެސެޖުތަކުގެ ޒަރީއާއިން އާންމުންގެ ޒާތީ މަޢުލޫމާތު ހޯދަމުންދާކަން ފާހަގަކުރެވިފައިވާ ކަމަށްވެސް އެ ކުންފުނިން ވިދާޅުވިއެވެ.
މިކަމާ ގުޅޭގޮތުން އިތުރަށް ތަފްސީލު ދެމުން އެޗްޑީސީން ބުނީ، ސަރުކާރުން ކުރިއަށްގެންދާ ހައުސިންގ މަޝްރޫޢުތަކާއި ސޯޝަލް ހައުސިންގ ނުވަތަ ފްލެޓްތަކާ ގުޅޭ އެއްވެސް މުއާމަލާތެއް ކުރުމަށް އެ ކުންފުނިން ވައިބަރ ނުވަތަ އާދައިގެ ފޯނު ކޯލު މެދުވެރިކޮށް އާންމުންނަށް ނުގުޅާނެ ކަމަށެވެ. އެހެންކަމުން، އެޗްޑީސީގެ ނަމުގައި އަންނަ މިފަދަ ފޯނު ކޯލުތަކަށާއި މެސެޖުތަކަށް ވަރަށް ބޮޑަށް ސަމާލުވުމަށް އެ ކުންފުނިން ވަނީ އާންމުންނަށް އިލްތިމާސްކޮށްފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކުރިއަށްގެންދާ ބޮޑެތި ހައުސިންގ މަޝްރޫއުތަކާއި އެޗްޑީސީން ހިންގާ އެކި ސްކީމްތަކާ ގުޅުވައިގެން މަކަރާއި ހީލަތުން ފައިސާ އާއި މައުލޫމާތު ހޯދުމުގެ ސްކޭމްތައް އެކި ފަރާތްތަކުން ދަނީ ހިންގަމުންނެވެ.
މިފަދަ ސްކޭމްތަކުން ރައްކާތެރިވުމުގެ ގޮތުން، އެއްވެސް މީހެއްގެ ޒާތީ މައުލޫމާތު ނުވަތަ ބޭންކް އެކައުންޓާ ގުޅޭ އެއްވެސް މައުލޫމާތެއް ފޯނުން ގުޅާ ފަރާތްތަކާ ހިއްސާ ނުކުރުމަށާއި، ގޮތް ނޭނގޭ ލިންކުތަކަށް ނުވަނުމަށް ކަމާ ގުޅުން ހުރި އިދާރާތަކުން ތަކުރާރުކޮށް ދަނީ ނަސޭހަތްތެރިވަމުންނެވެ. އެޗްޑީސީން ވަނީ އެ ކުންފުނީގެ ރަސްމީ މުއާމަލާތްތައް ކުރާނީ ކަނޑައެޅިފައިވާ ރަސްމީ އުސޫލުތަކުގެ ތެރެއިންކަމުގެ ޔަގީންކަން އާންމުންނަށް ދީފައެވެ.
