އިރާގުގެ ކުރީގެ ބޮޑުވަޒީރު ނޫރީ އަލް މާލިކީ އަލުން އެ މަގާމަށް އައްޔަންކޮށްފިނަމަ، އެމެރިކާއިން އެ ގައުމަށް ދެމުންދާ އެހީތައް ހުއްޓާލާނެ ކަމުގެ ހަރުކަށި އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފިއެވެ.
ޓްރަމްޕް މި އިންޒާރު ދެއްވީ، އިރާގުގެ ލީޑު ކުރާ ޕާޓީތަކުން އެކުލެވޭ ”ކޯޑިނޭޝަން ފްރޭމްވޯކް“ އިއްތިހާދުން ބޮޑުވަޒީރުކަމުގެ މަގާމަށް މާލިކީ ނޮމިނޭޓް ކުރުމާ ގުޅިގެންނެވެ.
ޓްރަމްޕްގެ ސޯޝަލް މީޑިއާ ޕްލެޓްފޯމްގައި ކުރެއްވި ޕޯސްޓެއްގައި ވިދާޅުވީ، މާލިކީއަކީ އިރާގަށް އޮތް ”ވަރަށް ގޯސް އިޚްތިޔާރެއް“ ކަމަށެވެ. މާލިކީ ކުރިން ބޮޑުވަޒީރުކަން ކުރެއްވި ދުވަސްވަރު އިރާގުގައި ފަގީރުކަމާއި، ސިޔާސީ ސަލާމަތްތެރިކަމާއި، ބޮޑެތި ހަމަނުޖެހުންތަކެއް ހިނގާފައިވާކަން ޓްރަމްޕް ފާހަގަކުރެއްވިއެވެ. އަދި މާލިކީ ވެރިކަމަށް ވަޑައިގެންފިނަމަ، އެމެރިކާގެ އެހީތެރިކަމާ ނުލައި އިރާގު ކުރިއަރައިދިއުމުގެ ފުރުސަތު ”ޒީރޯ“ އަށް ވެއްޓޭނެ ކަމަށްވެސް އޭނާ ވިދާޅުވިއެވެ.
2006 އިން 2014 އަށް އިރާގުގެ ބޮޑުވަޒީރުކަން ކުރެއްވި މާލިކީގެ ވެރިކަމަކީ މަޒްހަބީ ފިތުނައާއި ސިޔާސީ ކޯޅުންތަކުން ފުރިގެންވި ދުވަސްވަރެކެވެ. މުހައްލިލުން ވިދާޅުވާ ގޮތުގައި، މާލިކީ އިދިކޮޅު ފަރާތްތަކާ މެދު ގެންގުޅުއްވި ހަރުކަށި ސިޔާސަތުތަކުގެ ސަބަބުން ”އިސްލާމިކް ސްޓޭޓް“ (އައި.އެސް) ފަދަ ހަރުކަށި ޖަމާއަތްތައް އުފެދި، ގައުމުގެ ބޮޑު ބައެއް އެމީހުންގެ ބާރުގެ ދަށަށް ދިއުމަށް މަގުފަހިވިއެވެ.
މާލިކީގެ ނަން ބޮޑުވަޒީރުކަމަށް ހުށަހެޅި ނަމަވެސް، އިރާގުގެ ގާނޫނު ހަދާ މަޖިލީހުގެ ތެރޭގައި އުފެދިފައިވާ ޚިޔާލުތަފާތުވުންތަކުގެ ސަބަބުން މި މަގާމަށް މީހަކު އައްޔަންކުރުމުގެ ވޯޓުލުން ވަނީ ފަސްކޮށްފައެވެ.
ވޮޝިންޓަނުން އެންމެ ބޮޑަށް ކަންބޮޑުވަނީ މާލިކީ އާއި އީރާނާ ދެމެދު އޮންނަ ގާތް ގުޅުމާ މެދުގައެވެ. އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ އިރާގުގެ މިހާރުގެ ބޮޑުވަޒީރު މުހައްމަދު ޝިއާ އަލް ސޫދާނީއާ ފޯނުން ގުޅުއްވައި، މި ކަންބޮޑުވުންތައް ހިއްސާކުރައްވާފައެވެ. ރޫބިއޯ ވިދާޅުވީ އިރާގުގެ ސަރުކާރުން އިސްކަންދޭންވާނީ އެ ގައުމުގެ އަމިއްލަ މަސްލަހަތަށް ކަމަށެވެ.
ޓްރަމްޕްގެ މި އިންޒާރާއެކު، އިރާގުގެ ސަލާމަތީ، އަސްކަރީ އަދި އިގްތިސާދީ ދާއިރާއަށް އެމެރިކާއިން ދޭ އެހީތައް މުރާޖައާ ކުރާނެ ކަމުގެ ބިރު ވަނީ ހީވެފައެވެ. މިއީ އިރާގުގެ ދާޚިލީ ސިޔާސީ ކަންކަމުގެ ތެރެއަށް އެމެރިކާއިން މިފަދަ ސީދާ ގޮތެއްގައި ތަދަޚުލްވި މަދު ފަހަރުތަކުގެ ތެރެއިން ފަހަރެކެވެ.
