އެމެރިކާގެ ރައީސް ޑޮނަލްޑް ޓްރަމްޕް ކެބިނެޓް ބައްދަލުވުމެއްގެ ތެރޭގައި އަވަހާރަފުޅު ލެއްޕެވި ކަމަށް ދެކެވޭ ވާހަކަތައް އެމަނިކުފާނު މިއަދު ދޮގުކުރައްވައިފިއެވެ. ވައިޓް ހައުސްގައި ފަހުން ބޭއްވި ކެބިނެޓް ސެޝަނެއްގައި ވާހަކަފުޅު ދައްކަވަމުން ޓްރަމްޕް ވިދާޅުވީ، ލޯފުޅު މަރައިގެން އިންނެވީ ވަރުބަލިފުޅުވެގެން ނޫން ކަމަށާއި، އެއީ އެ ބައްދަލުވުން މާ ބޮޑަށް ފޫހިވުމުން ކަމަށެވެ.
ސަކަރާތް މިޒާޖެއްގައި ވާހަކަފުޅު ދައްކަވަމުން ޓްރަމްޕް ވިދާޅުވީ، ކުރިން ބޭއްވި ބައްދަލުވުން ފޫހިވުމުން ކުޑަ ވަގުތުކޮޅަކަށް ލޯފުޅު މަރާލެވުނު ނަމަވެސް، ހުންނެވީ ފުރިހަމައަށް ހޭލާ ކަމަށެވެ. އަދި އެ ބައްދަލުވުން އަވަހަށް ނިމޭނެ އިރަކަށް އިންތިޒާރު ކުރައްވަމުން ގެންދެވި ކަމަށާއި، އާންމުކޮށް ވެސް ގިނައިރު އަވަހާރަފުޅު ނުލައްވާ ކަމަށް އެމަނިކުފާނު އިތުރުކުރެއްވިއެވެ.
މި ހާދިސާ ހިނގާފައިވަނީ 81 މިނެޓަށް ދެމިގެންދިޔަ ކެބިނެޓް ބައްދަލުވުމެއްގައެވެ. މި ބައްދަލުވުމުގައި ޓްރަމްޕް ވަނީ އެޖެންޑާގައި ހުރި ބައެއް މުހިންމު ކަންކަން ދޫކޮށްލައްވައި، ނޫސްވެރިންނާ ވާހަކަދެއްކެވުން ވެސް މަދުކުރައްވާފައެވެ.
އުމުރުފުޅުން 79 އަހަރުގެ ޓްރަމްޕްގެ ސިއްހަތާއި ހަކަތައާ މެދު ސުވާލު އުފެދިފައިވާ ދަނޑިވަޅެއްގައި މިފަދަ ވާހަކަތަކެއް ފެންމަތިވުމުން، އެމަނިކުފާނުގެ ޓީމުން ދަނީ ޓްރަމްޕަކީ ސިއްހީ ގޮތުން ދުޅަހެޔޮ، ހަރަކާތްތެރި ބޭފުޅެއްކަން ދެއްކުމަށް މަސައްކަތް ކުރަމުންނެވެ. އެގޮތުން އެމަނިކުފާނުގެ ދުވަހީ މަސައްކަތްތަކާއި، ސިޔާސީ ބައްދަލުވުންތަކާއި، މީޑިއާއާ ބާއްވާ ގުޅުންތައް ޓީމުން ފާހަގަކުރެއެވެ.
ޓްރަމްޕްގެ އަތްޕުޅުގައި ނޫފައިގެންފައި ހުރި ނިޝާންތަކެއް ފެނުމާ ގުޅިގެން ވައިޓް ހައުސް އިން ބުނީ، އެއީ ހިތުގެ ބަލިތަކުން ރައްކާތެރިވުމަށް އެމަނިކުފާނު ބޭނުންކުރައްވާ އެސްޕިރިން ބޭހުގެ ސަބަބުން ވާގޮތެއް ކަމަށެވެ. އަދި ދާދި ފަހުން ހެދި މެޑިކަލް ޓެސްޓުތަކުން ޓްރަމްޕްގެ ހިތުގެ ސިއްހަތު ރަނގަޅުކަން ކަށަވަރުވެފައިވާ ކަމަށް ވެސް އޮފިޝަލުން ވިދާޅުވިއެވެ.
މީގެ ކުރިން ވެސް އެމެރިކާގެ ބައެއް ރައީސުންނަށް މިފަދަ ފާޑުކިޔުންތައް އަމާޒުވެފައިވެއެވެ. އޭގެ ތެރޭގައި 1980 ގެ އަހަރުތަކުގައި ރޮނަލްޑް ރޭގަން އާއި، ދާދި ފަހުން 2024 ވަނަ އަހަރުގެ އިންތިޚާބުން ވަކިވެވަޑައިގަތް ޖޯ ބައިޑަން ހިމެނެއެވެ. ޓްރަމްޕަކީ އެމެރިކާގެ ތާރީޚުގައި ވެސް މަގާމުގެ ހުވާކުރެއްވި އެންމެ އުމުރުން ދުވަސްވީ ރައީސެވެ.
