ހޮސްޕިޓަލިޓީ އަދި ފަތުރުވެރިކަމުގެ ދާއިރާއިން ވަޒީފާ ހޯދާ ފަރާތްތަކާއި ވަޒީފާ ދޭ ފަރާތްތައް އެއް ފުރާޅެއްގެ ދަށުން ގުޅުވައިދޭނެ ޚާއްސަ ޕްލެޓްފޯމެއް ކަމަށްވާ ”ރުކުރި“ ރަސްމީކޮށް ތަޢާރަފުކޮށްފިއެވެ.
މި ޕްލެޓްފޯމް އިފްތިތާޙުކުރުމަށް ބޭއްވި ޚާއްސަ ހަފްލާ އޮތީ މިއަދު ބާސެލޯސް ނަސަންދުރައިގައެވެ. ”ރުކުރި“ އަކީ ރާއްޖޭގެ ފަތުރުވެރިކަމުގެ ދާއިރާ ކުރިއަރަމުން އަންނަ މިންވަރަށް ރިއާޔަތްކޮށް، ވަޒީފާގެ ފުރުސަތުތައް ހޯދުމުގައި ދިމާވާ ގޮންޖެހުންތަކަށް ހައްލެއް ހޯދައިދިނުމަށް 2023 ވަނަ އަހަރު އުފެއްދި ޕްލެޓްފޯމެކެވެ.
އައިލެންޑް ރެކްރޫޓްސްއިން ތަރައްޤީކޮށްފައިވާ މި ޕްލެޓްފޯމް މެދުވެރިކޮށް، ލަގްޒަރީ ރިސޯޓުތަކުގެ ލީޑަރޝިޕް މަޤާމުތަކުން ފެށިގެން، ގެސްޓްހައުސްތަކާއި، ރެސްޓޯރަންޓްތަކުގެ އިތުރުން ފަތުރުވެރިކަމުގެ ދާއިރާގެ އެކި ދާއިރާތަކުން ހުޅުވާލާފައިވާ ވަޒީފާތަކުގެ މަޢުލޫމާތު ފަސޭހަކަމާއެކު ބަލައިލެވޭނެއެވެ.
މި ޕްލެޓްފޯމުގެ އެންމެ ޚާއްސަ އެއް ސިފައަކީ، ވަޒީފާއަށް ކުރިމަތިލާ ފަރާތްތަކަށް އެ ފަރާތެއްގެ އެޕްލިކޭޝަން ކުރިއަށްދާ ގޮތުގެ އަދާހަމަ (ލައިވް އަޕްޑޭޓްސް) ވަގުތުން ބަލައިލެވުމެވެ. އަދި ވަޒީފާ ދޭ ފަރާތްތަކަށްވެސް މީހުން ހޮވުމުގެ މަރުހަލާ ދެފުށް ފެންނަ، ހަރުދަނާ ނިޒާމެއްގެ ތެރެއިން ކުރިއަށް ގެންދިއުމުގެ ފުރުސަތު މި ޕްލެޓްފޯމުން ލިބިގެންދެއެވެ.
މި ހަފްލާގައި ވާހަކަދައްކަވަމުން ރުކުރިގެ ކޯ-ފައުންޑަރ އަލީ ފާއިޒް ވިދާޅުވީ، މި ޕްލެޓްފޯމުގެ މައިގަނޑު މަޤްޞަދަކީ ވަޒީފާ ދޭ ފަރާތްތަކާއި ވަޒީފާ ހޯދާ ފަރާތްތަކާ ދެމެދު އޮންނަ ގުޅުން ބަދަހިކޮށް، ހަމަހަމަ ފުރުސަތުތަކެއް ފަހިކޮށްދިނުން ކަމަށެވެ. އަދި މީގެ ސަބަބުން ދިވެހި މަސައްކަތްތެރިން ބާރުވެރިވެ، ވަޒީފާއަށް މީހުން ނެގުމުގެ މަރުހަލާގައި ހުރި ތަކްލީފުތަކަށް ބޮޑު ލުޔެއް ލިބޭނެ ކަމަށް އޭނާ ފާހަގަކުރެއްވިއެވެ.
މި ޕްލެޓްފޯމަކީ ރާއްޖޭގެ ވަޒީފާގެ ބާޒާރަށް، ޚާއްސަކޮށް ފަތުރުވެރިކަމުގެ ސިނާޢަތަށް ލިބިގެންދިޔަ މުހިންމު ކުރިއެރުމެއްގެ ގޮތުގައި ގިނަ ބަޔަކު ދެކެއެވެ.
