ޙައްޖު ދުވަހާއި މިއަހަރުގެ އަޟްހާ ޢީދާ ގުޅިގެން ބަންދުވާނީ މިހާރުވެސް ކަލަންޑަރުގައި ބަނދު ކަމަށް ކަނޑައަޅާފައިވާ ދުވަސްތައް ކަމުގައި ރައީސް އޮފީހުން ވިދާޅުވެއްޖެއެވެ.
އިސްލާމިކް މިނިސްޓްރީން ވެސް ރޭގައި އިއުލާނު ކޮށްފައިވާ ގޮތުގައި މިއަހަރުގެ ޙައްޖު ދުވަސް (އަރަފާތު ދުވަސް) ވަނީ އަންނަ ޖޫން މަހުގެ 5 ވަނަ ދުވަހަށެވެ. އަދި އަޟްހާ ޢީދު ދުވަހަށް ވަނީ ޖޫން 6 ވާ ހުކުރު ދުވަހެވެ. މިއީ ކަލަންޑަރުގައި ވެސް ފާހަގަ ކޮށްފައިވާ ގޮތެވެ.
ރައީސް އޮފީހުގެ ތަރުޖަމާނު ހީނާ ވަލީދު މިއަދު ”އެކްސް“ ގައި ކުރެއްވި ޕޯސްޓެއްގައި ވިދާޅުވެފައިވަނީ މިއަހަރުގެ ޙަައްޖު ދުވަސް ދިމާވަނީ، 5 ޖޫން ވާ ބުރާސްފަތި ދުވަހަށް ކަމުގައި ސައުދީ ޢަރަބިއްޔާއިން ކަނޑައެޅުމާ ގުޅިގެން، ޙައްޖު ދުވަހާއި އަޟްހާ ޢީދާ ގުޅިގެން ބަންދުވާނީ، މިހާރުވެސް ކަލަންޑަރުގައި ބަންދު ކަމަށް ކަނޑައަޅާފައިވާ ދުވަސްތައް ކަމަށެވެ.
ކަލަންޑަރުން ދައްކައި ގޮތުގައި އަޟްހާ ޢީދު ދުވަހުގެ މުނާސަބަތުގައި 7 ޖޫން ވާ ހޮނިހިރު ދުވަހުގެ އިތުރުން ދެން ބަންދު ވަނީ 8 އަދި 9 ޖޫން (އާދީއްތަ އަދި ހޯމަ) ދުވަހެވެ.
