މާލެ ސިޓީ ކައުންސިލްގެ ވިލިމާލެ ދާއިރާގެ ކައުންސިލަރު، ނަހުލާ އަލީ މާލެ ސިޓީ ކައުންސިލުން ކުއްޔަށް ދޫކޮށްފައިވާ ބިންތަކެއްގެ އެގްރީމެންޓުތަކެއް ވީދާލި މައްސަލައެއް ފުލުހުންނަށް ހުށަހަޅައިފި އެވެ.
މާލެ ސިޓީ ކައުންސިލުން ބޭއްވި އެކައުންސިލްގެ މިއަދުގެ ބައްދަލުވުމުގައި މޭޔަރު އާދަމް އާޒިމް ވަނީ މާލޭގެ ބިންތަކަކާ ބެހޭ އެއްބަސްވުންތަކެއްް މެންބަރު ނަހުލާ ވީދާލާ މަންޒަރު ފެންނަ ވީޑިއޯއެއް ކައުންސިލަރުންނާ ހިއްސާ ކޮށްފަ އެވެ. އަދި މޭޔަރު އާޒިމް ވިދާޅުވީ ނަހުލާ ވީދާލާފައި ވަނީ އެ ކައުންސިލުން އާންމުކުރި ބިމުގެ ދަފުތަރުގައި ނުހިމެނި އޮތް ކޮންޓްރެކްޓެއް ކަމަށެވެ.
އެއަށްފަހު އާދަމް އާޒިމް ވިދާޅުވީ މިހާރުވެސް އެ ކައުންސިލް ތެރޭގައި ކަންކަން ގޯސްކޮށް ކުރަމުންދާކަން އެކަމުން ހާމަވާ ކަމަށާއި، ކައުންސިލުގައި ލިޔެކިޔުންތައް ހުރިކަން ނުވަތަ ނެތްކަން ނޭނގޭ ކަމަށް ވިދާޅުވާން ޖެހޭ ސަބަބަކީ އެއީ ކަމަށެވެ.
އެހެންކަމުން އެ އެއްބަސްވުން ވީދާލާ މަންޒަރު ފެންނަ ވީޑީއޯ މިހާރު ވާނީ ފުލުހުންނަށާއި އެލްޖީއޭ އަށް ހުށަހަޅާފައިކަމަށް ވިދާޅުވެ މޭޔަރ އާޒިމް ވިދާޅުވީ ރަސްމީ ލިޔެކިޔުމެއް ވީދާލުމަކީ ޖިނާއީ ކުށެއް ކަމަށާއި ސިޓީ ކައުންސިލުގައި ހުންނަ އެއްވެސް ލިޔެކިޔުމެއް ނައްތާލުމުގެ ބާރު އެ ކައުންސިލުގެ އެއްވެސް މެންބަރަކަށް ލިބިގެން ނުވާ ކަމަށެވެ. އަދި އެ މައްސަލައާ ގުޅިގެން ސިޓީ ކައުންސިލްގެ މުވައްޒަފުންގެ ބަޔާންތައް ވެސް ނަގާފައިވާ ކަމަށާއި އެ ބަޔާންތައް ފުލުހުންނާ ހިއްސާކުރައްވާނެ ކަމަށް ވެސް އާޒިމް ވިދާޅުވި އެވެ.
މޭޔަރު އާޒިމްގެ މި ތުހުމަތާ ގުޅިގެން މެންބަރު ނަހުލާ ވިދާޅުވީ އެއްބަސްވުމެއް ވިދާލެއްވި ކަމަށާއި، ނަމަވެސް އެއީ ކުރީގެ ތާރީހެއް ޖަހައިގެން ވިލިމާލޭގެ ބިމެއް ހަވާލުކުރުމަށް މިދިޔަ ބުރާސްފަތި ދުވަހު ސޮއިކުރި އެއްބަސްވުމެއް ކަމަށެވެ. އަދި މިދިޔަ މަހު އާންމުކުރި މާލޭގެ ބިންތަކުގެ ދަފުތަރުގައި ވިލިމާލެއިން ދޫކޮށްފައިވާ 9 ބިމުގެ ތެރެއިން 6 ބިމެއް އުނިކޮށްފައިވާ ކަމަށާއި އެކަން ކައުންސިލުގެ ސަމާލުކަމަށް އޭނާ ވާނީ ގެނެސްފައިކަމަށެވެ.
