ބައިނަލްއަޤްވާމީ މަދަނީ ދަތުރުފަތުރުގެ ޖަމްޢިއްޔާ (އައިކާއޯ) އިން ލަފާކުރާ ގޮތުގައި، 2050 ވަނަ އަހަރާ ހަމައަށް ދުނިޔޭގައި އަހަރަކު ދަތުރުފަތުރުކުރާ މީހުންގެ އަދަދު 12.4 ބިލިއަނަށް އަރާނެއެވެ. ވައިގެ ދަތުރުފަތުރުގެ ދާއިރާއަށް ކުރިއަށް އޮތް 25 އަހަރު ތެރޭގައި އަންނާނެ ބޮޑު ކުރިއެރުންތަކަށް ތައްޔާރުވުމުގެ ގޮތުން އެކުލަވާލާފައިވާ ސްޓްރެޓީޖިކް ޕްލޭނެއް، ބައިނަލްއަޤްވާމީ މަދަނީ ދަތުރުފަތުރުގެ ދުވަހާ ގުޅުވައިގެން އައިކާއޯއިން ވަނީ ހާމަކޮށްފައެވެ.
މި ތަފާސްހިސާބުތަކުން ދައްކުވައިދެނީ އޭވިއޭޝަން ދާއިރާއަށް ބޮޑެތި ކުރިއެރުންތަކެއް އަންނާނެ ކަމާއި، މިއާއެކު ގިނަ ގޮންޖެހުންތަކަކާ ކުރިމަތިލާން ޖެހިދާނެ ކަމެވެ. އައިކާއޯއިން ވަނީ އަލަށް ތަރައްޤީވެފައިވާ އަމިއްލައަށް ދަތުރުކުރާ (އޮޓޮނޮމަސް) މަތިންދާބޯޓުތައް ވަރަށް އަވަހަށް ހިދުމަތް ދޭން ފަށާނެ ކަމަށް ލަފާކޮށްފައެވެ. މިފަދަ ބޯޓުތައް ވައިގެ ދަތުރުފަތުރުގެ އުނދަގޫ ނިޒާމުގެ ތެރެއަށް ރައްކާތެރިކަމާއެކު ހިމެނުމަށް އައު ސަލާމަތީ، އޮޕަރޭޝަނަލް އަދި ގަވާއިދީ ފިޔަވަޅުތަކެއް ބޭނުންވާނެ ކަމަށް ވެސް އައިކާއޯއިން ބުނެއެވެ.
އައިކާއޯއިން ހާމަކޮށްފައިވާ ގޮތުގައި، ”ދަތުރުފަތުރު އިތުރުވުމާއެކު، އޭވިއޭޝަން ދާއިރާއަށް ރައްކާތެރިކަން، ސަލާމަތްތެރިކަން އަދި ސައިބަރ ސެކިއުރިޓީއާ ގުޅޭ ގޮތުން ގިނަ ގޮންޖެހުންތަކަކާ ކުރިމަތިލާން ޖެހޭ. މިކަންކަމަށް ހަރުދަނާ ފިޔަވަޅުތަކެއް އަޅަންޖެހޭ.“ މިކަން 2026 އިން 2050 އަށް އެކުލަވާލާފައިވާ ސްޓްރެޓީޖިކް ޕްލޭނުގައި ވެސް ފާހަގަކޮށްފައި ވެއެވެ. މިޕްލޭނުގައި ވައިގެ ދަތުރުފަތުރުގެ ސަބަބުން ތިމާވެއްޓަށް ލިބޭ ގެއްލުން ކުޑަކުރުމަށް ގްލޯބަލް ފެންވަރުގައި ހަދާފައިވާ އެއްބަސްވުންތައް ހިމެނެއެވެ. އައިކާއޯއިން ވަނީ ދުނިޔޭގެ މޫސުމަށް އަންނަ ބަދަލުތަކާ ގުޅިގެން، 2050 އާ ހަމައަށް ބައިނަލްއަޤްވާމީ ވައިގެ ދަތުރުފަތުރުގެ ސަބަބުން އުފެދޭ ކާބަން ގޭސްގެ މިންވަރު ސުމަކަށް ގެނައުމަށް އަމާޒު ހިފާފައިވާ ކަން ވެސް ހާމަކޮށްފައެވެ.
މިޕްލޭނުން ދުނިޔޭގެ އޭވިއޭޝަން ދާއިރާއަށް ކުރިމަތިވެދާނެ ބޮޑެތި މައްސަލަތައް ހައްލުކުރުމަށްޓަކައި ”އިސްކަންދޭންޖެހޭ މުހިންމު ކަންކަން“ ފާހަގަކޮށްފައި ވެއެވެ. މި ފިޔަވަޅުތަކުގެ މަޤްޞަދަކީ ދުނިޔޭގެ ވައިގެ ދަތުރުފަތުރުގެ ނިޒާމުގެ ކެތްތެރިކަން، ދެމެހެއްޓެނިވި ގޮތެއްގައި ކުރިއެރުވުން އަދި ހުރިހާ ފަރާތްތަކަށް ހިމެނޭ ގޮތަށް ތަރައްޤީކުރުމެވެ. މިއާއެކު، ރޭވުންތެރި މަޤްޞަދުތަކަށް ވާސިލްވުމަށް ކުރިއެރިފައިވާ މިންވަރު ބެލެހެއްޓުމަށް ދެމިހުންނާނެއެވެ.
އައިކާއޯގެ މަގުޗާޓުން ދައްކުވައިދެނީ، ދަތުރުފަތުރުކުރާ މީހުންގެ އަދަދު އެތައް ގުނައަކަށް އިތުރުވުމުގެ އިތުރުން، ވައިގެ ދަތުރުފަތުރާއި އޮޕަރޭޝަނަލް ނިޒާމްތަކަށް ބަދަލުތަކެއް ގެނެސްދާނެ އައު ޖީލުގެ މަތިންދާބޯޓުގެ ޓެކްނޮލޮޖީތައް ރައްކާތެރިކަމާއެކު ތަޢާރަފްކުރެވޭނެ ކަމެވެ. ވައިގެ ދަތުރުފަތުރު އިތުރުވުމާއެކު، ބައިނަލްއަޤްވާމީ ރެގިއުލޭޓަރުންގެ މެދުގައި ގުޅިގެން މަސައްކަތްކުރުމާއި، އިންފްރާސްޓްރަކްޗަރަށް އިންވެސްޓްކުރުމާއި، ކެޕޭސިޓީ އެންމެ އެދެވޭ ގޮތުގައި މެނޭޖްކުރުމަށް އީޖާދީ ޓެކްނޮލޮޖީތައް ބޭނުންކުރުން އިތުރުކުރަންޖެހޭނެ ކަމަށް ވެސް އެ ޖަމްޢިއްޔާއިން ފާހަގަކުރެއެވެ.
އައިކާއޯގެ ލަފާތަކާއި ހުށަހެޅުންތަކަކީ ސަރުކާރުތަކަށާއި، އެއާލައިންތަކަށާއި، އޭވިއޭޝަން ދާއިރާގެ ހިއްސާދާރުންނަށް، ކުރިއާލާ ނުފެންނަފަދަ ބޮޑެތި ކުރިއެރުންތަކެއް އަންނާނެ މުސްތަޤްބަލަކަށް މަގުދައްކާ މަގުޗާޓެކެވެ. މި ކުރިއެރުންތައް ގުޅިފައިވަނީ ރައްކާތެރިކަމާއި، ސެކިއުރިޓީއާއި، ތިމާވެށި ރައްކާތެރިކުރުމުގެ ޒިންމާއާއެވެ. ދުނިޔޭގައި ދަތުރުފަތުރުގެ ބޭނުން އިތުރުވަމުންދާ މި ދަނޑިވަޅުގައި، އޭވިއޭޝަން ދާއިރާއަށް ދެ ގޮންޖެހުމަކާ ކުރިމަތިލާން ޖެހެއެވެ: އެއީ އެ ބޭނުންތައް ފުއްދުމާއެކު ސަލާމަތީ މިންގަނޑުތައް ހަރުދަނާކުރުމާއި، ކާބަން ނިއުޓްރަލްގެ އަމާޒުތަކަށް ވާސިލްވުމެވެ. އައިކާއޯގެ ސްޓްރެޓީޖިކް ޕްލޭނަކީ ކުރިއަށް އޮތް 25 އަހަރު ތެރޭގައި މި ގޮންޖެހުންތަކާ ކުރިމަތިލާނެ ގޮތުގެ މަގެއް ދައްކައިދޭ އެއްޗެކެވެ.
