ދުނިޔޭގެ އެންމެ އުސް އިމާރާތް ކަމަށްވާ ބުރުޖް ޚަލީފާއަށް ހޮނުއަޅާ ނާދިރު މަންޒަރު ފެނިފައިވަނީ ބޯކޮށް ވާރޭވެހި ދުބާއީގެ މޫސުން ވަރަށް ބޮޑަށް ގޯސްވެފައިވަނިކޮށެވެ. މި ހާދިސާގެ ވީޑިއޯއެއް ވަރަށް ހަލުވިކަމާއެކު ސޯޝަލް މީޑިއާގައި ވައިރަލްވެފައިވެއެވެ.
މި ކުރު ވީޑިއޯ ހިއްސާކުރައްވާފައިވަނީ ދުބާއީގެ ވަލީއަހުދު އަދި ޔުނައިޓެޑް އަރަބް އެމިރޭޓްސްގެ ދިފާޢީ ވަޒީރު، ޝައިޚް ހަމްދާން ބިން މުޙައްމަދު ބިން ރާޝިދު އަލް މަޚްތޫމްއެވެ. ވީޑިއޯއިން ފެންނަ ގޮތުގައި، ބުރުޖް ޚަލީފާ ވަނީ ކަޅުވިލާތަކުން ވަށާލެވިފައެވެ. އަދި އުޑުގެ ކުލަ ފެހިކުލައަކަށް ބަދަލުވެފައިވަނިކޮށް، އިމާރާތުގެ އެންމެ މައްޗަށް ވިދުވަރު ޖަހާ މަންޒަރު ވަރަށް ސާފުކޮށް ފެނެއެވެ. ޝައިޚް ހަމްދާން މި ވީޑިއޯ ޕޯސްޓުކުރެއްވީ، ކުރިއަށް އޮތް ދުވަސްތަކުގައި މޫސުމަށް އަންނާނެ ނުތަނަވަސް ބަދަލުތަކަށް ތައްޔާރުވެ، ސަމާލުވެތިބުމަށް ރަށްވެހިންނަށް ނަސޭހަތްތެރިވެވަޑައިގަތުމަށް ފަހުގައެވެ. މި މަންޒަރު ދުށް ސޯޝަލް މީޑިއާ ބޭނުންކުރާ ފަރާތްތަކުން ވަނީ ”ނޭވާހިފާލެވޭ ފަދަ“ އަދި ”ކަންބޮޑުކުރުވަނިވި“ މަންޒަރެއްގެ ގޮތުގައި ސިފަކޮށްފައެވެ.
ޔުނައިޓެޑް އަރަބް އެމިރޭޓްސްގެ ނެޝަނަލް ސެންޓަރ އޮފް މީޓިއޮރޮލޮޖީން ބުނާ ގޮތުގައި، މި މަހުގެ 18 ވާ ބުރާސްފަތި ދުވަހު ”އަލް-ބަޝީރު“ ގެ ނަމުން މަޝްހޫރު ލޯ-ޕްރެޝަރ ސިސްޓަމެއް ގައުމުގެ މަތީގައި އުފެދިފައިވެއެވެ. މި މޫސުމީ ނިޒާމުގެ ސަބަބުން ޝާރްޖާ އަދި ރާސް އަލް-ޚައިމާގެ ބައެއް ސަރަހައްދުތައް ވެސް ހިމެނޭ ގޮތަށް އެތައް ސަރަހައްދުތަކަކަށް ބޯކޮށް ވާރޭވެހި ގަނޑުފެން ވެސް ވެހިފައިވެއެވެ. މޫސުމާބެހޭ މަސްއޫލުވެރިން ވިދާޅުވީ މި ނުތަނަވަސް މޫސުމަކީ ރަތް ކަނޑުން ފެށިގެން އަންނަ ލޯ ޕްރެޝަރ ސަރަހައްދެއްގެ ސަބަބުން، ގިނަ އަދަދެއްގެ ވިލާތައް އުފެދި، ޔޫއޭއީގެ އެކި ސަރަހައްދުތަކަށް ގުގުރުމާއި ވިދުމާއެކު ހެއިލް ވެހުމުގެ ފުރުސަތު ބޮޑުވެފައިވާ ކަމަށެވެ.
ދުބާއީ އަދި އަބޫދާބީގެ އެކި ސަރަހައްދުތަކަށް ގުގުރުމާއި ވިދުމާއެކު ބޯކޮށް ވާރޭވެހުމާ ގުޅިގެން، ކަމާބެހޭ ފަރާތްތަކުން ވަނީ ސަރުކާރާއި އަމިއްލަ ކުންފުނިތަކުގެ މުވައްޒަފުންނަށް ގޭގައި މަސައްކަތްކުރުމަށް (ވޯކް-ފްރޮމް-ހޯމް) ހަމަޖައްސާފައެވެ. އާންމުންނަށް ލާޒިމު ނޫން ދަތުރުތައް ކުރުމުން ރައްކާތެރިވެ، ބޭރަށް ނުކުންނަން ޖެހިއްޖެނަމަ ސަމާލުވުމަށް ދުބާއީ ފުލުހުން ވަނީ އިލްތިމާސްކޮށްފައެވެ. މުހިންމު މަސައްކަތްތައް ކުރާ މުވައްޒަފުން ފިޔަވައި، އެހެނިހެން މުވައްޒަފުންނަށް ވަނީ ގޭގައި މަސައްކަތްކުރުމަށް އަންގާފައެވެ. މީގެ އިތުރުން ގްލޯބަލް ވިލެޖް، އައިން ދުބާއީ، އަދި ސްކައިޑައިވް ދުބާއީ ހިމެނޭ ގޮތަށް ބައެއް މަޝްހޫރު ތަންތަން ވަނީ ވަގުތީ ގޮތުން ބަންދުކޮށް، ހަރަކާތްތައް ހުއްޓާލާފައެވެ. ކަމާބެހޭ އިދާރާތަކުން ދަނީ މި ހާލަތު ގާތުން ބަލަމުންނެވެ.
މޫސުން ގޯސްވުމުގެ ސަބަބުން ފްލައިޓްތަކަށް ވެސް ވަނީ އަސަރުކޮށްފައެވެ. ދުބާއީ އެއަރޕޯޓްގެ އިދާރާއިން ވަނީ ފްލައިޓްތަކަށް ފުރާ ގަޑިއަށް ހަތަރު ގަޑިއިރު ކުރިން އެއަރޕޯޓަށް ދިއުމަށް ފަސިންޖަރުންނަށް އަންގާފައެވެ. މީޑިއާ ރިޕޯޓުތައް ބުނާ ގޮތުގައި، ހަތް ފްލައިޓް ކެންސަލްކޮށް، 15 ފްލައިޓް ވަނީ ލަސްވެފައެވެ. މޫސުމާބެހޭ މާހިރުން ވަނީ ކަނޑުގަދަވެ ވައިގަދަވުމުގެ ފުރުސަތު އޮތް ކަމަށް އިންޒާރު ދެއްވާ، ރައްކާތެރިކަމުގެ ފިޔަވަޅުތައް އެޅުމަށް ގޮވާލާފައެވެ. ދުބާއީ ފުލުހުންގެ ތަރުޖަމާނު ވިދާޅުވީ، ކޮންމެހެން ބޭރަށް ނުކުންނަން ޖެހިއްޖެ ހާލަތެއް މެނުވީ ގޭގައި މަޑުކުރުމަށް އަދި އިންޒާރުތަކަށް ފުރިހަމައަށް އަމަލުކުރުމަށް ރައްޔިތުންނަށް އިލްތިމާސްކުރާ ކަމަށެވެ. ގޭގައި މަސައްކަތްކުރުމުގެ އަމުރު އަމިއްލަ ކުންފުނިތަކަށް ވެސް ހިނގާނެ ކަމަށާއި، މުވައްޒަފުންގެ ސަލާމަތާއި ރައްކާތެރިކަމަށްޓަކައި މި ސިޔާސަތުތައް ތަންފީޒުކުރުމަށް އެ ކުންފުނިތަކަށް ބާރުއަޅާ ކަމަށް ވެސް ރިޕޯޓުތައް ބުނެއެވެ.
