ދުނިޔޭގެ އެންމެ އަގުބޮޑު ޓެކްނޮލޮޖީ ކުންފުނި، އެޕަލްގެ ސީއީއޯގެ މަގާމުގައި ހުންނެވި ޓިމް ކުކް އެ މަގާމުން ވަކިވެވަޑައިގަތުމަށް ތައްޔާރުވަމުންދާ ކަމަށް ރިޕޯޓުތައް ބުނަން ފަށައިފިއެވެ. މި ބަދަލާއެކު އެޕަލްގެ އިސްވެރިޔާގެ މަގާމަށް އަންނާނެ ބޭފުޅަކާ ބެހޭގޮތުން ކުންފުނީގެ އެތެރޭގައި މިހާރު މަޝްވަރާތައް ފެށިފައިވާ ކަމަށް ޚަބަރުތައް ލިބެއެވެ.
2011 ވަނަ އަހަރު ކުންފުނީގެ ބާނީ ސްޓީވް ޖޮބްސްއަށް ފަހު އެޕަލްއާ ހަވާލުވި ޓިމް ކުކް އަކީ ސިލިކަން ވެލީގައި އެންމެ ގިނަ ދުވަހު ސީއީއޯގެ މަގާމު އަދާކުރައްވަމުންދާ އެއް ބޭފުޅާއެވެ. މަސްދަރުތަކުން ބުނާ ގޮތުގައި، ކުކް މިހާރު ވަނީ އޭނާގެ މަސްއޫލިއްޔަތުތައް ބޮޑުވެ، މަގާމުގެ ޒިންމާތަކުން ތަންކޮޅެއް ދުރަށް ޖެހިލަން ބޭނުންވާކަން ކުންފުނީގެ އިސްވެރިންނަށް އަންގާފައެވެ. ނަމަވެސް، އޭނާ އެޕަލްއާ މުޅިން ވަކިވާނެ ކަމަކަށް ނުބެލެވެއެވެ. ބޮޑަށް ބެލެވެނީ އޭނާ ކުންފުނީގެ ”ޗެއާމަން އޮފް ދަ ބޯޑު“ ގެ މަގާމާ ހަވާލުވާނެ ކަމަށެވެ. މީގެ ސަބަބުން ކުންފުނީގެ ދުވަހުން ދުވަހުގެ ހިންގުމުގައި ބައިވެރިނުވި ނަމަވެސް، ކުންފުންޏަށް އިރުޝާދު ދިނުމުގައި އޭނާއަށް ދެމިހުރެވޭނެއެވެ.
އެޕަލްގެ އާ ސީއީއޯއަކަށް ބޭރުގެ ބޭފުޅަކު ގެނައުމުގެ ބަދަލުގައި، ކުންފުނީގެ އެތެރޭގައި ތިއްބެވި އިސް ބޭފުޅުންނަށް އިސްކަންދޭނެ ކަމަށް ބެލެވެއެވެ. މިގޮތުން ސީއީއޯގެ މަގާމަށް އަތުވެދާނެ ކަމަށް ބެލެވޭ ބޭފުޅުންގެ ތެރޭގައި ސޮފްޓްވެއަރ އިންޖިނިއަރިންގެ ނައިބު ރައީސް ކްރެއިގް ފެޑެރިގީ، ސާވިސަސްގެ ނައިބު ރައީސް އެޑީ ކިއު، މާކެޓިންގްގެ ނައިބު ރައީސް ގްރެގް ޖޮސްވިއަކް އަދި ރީޓެއިލްގެ ނައިބު ރައީސް ޑިއަރޑްރޭ އޯބްރަޔަން ހިމެނެއެވެ.
ނަމަވެސް، މި ހުރިހާ ބޭފުޅުންނަށްވުރެ ބޮޑަށް މި މަގާމަށް އަތުވެދާނެ ކަމަށް އެންމެ ބޮޑަށް ބެލެވެނީ ހާޑްވެއަރ އިންޖިނިއަރިންގެ ސީނިއާ ނައިބު ރައީސް ޖޯން ޓާނަސް އެވެ. 2001 ވަނަ އަހަރު އެޕަލްއާ ގުޅުނު ޓާނަސް އަކީ އައިފޯން، އައިޕެޑް، މެކް ކޮމްޕިއުޓަރު އަދި އެއަރޕޮޑްސް ފަދަ ކުންފުނީގެ އެންމެ މުހިންމު އުފެއްދުންތައް ތައްޔާރުކުރުމުގައި އިސްދައުރެއް އަދާކޮށްފައިވާ ބޭފުޅެކެވެ. އޭނާގެ ތަޖުރިބާއާއި ކުންފުނީގައި ހޭދަކޮށްފައިވާ ދިގު މުއްދަތުގެ ސަބަބުން، ޓިމް ކުކްގެ ފަހުން އެޕަލްއާ ހަވާލުވާނެ އެންމެ ގާބިލު ބޭފުޅަކީ އޭނާ ކަމަށް ގިނަ ބަޔަކު ގަބޫލުކުރެއެވެ.
އެޕަލް ފަދަ ދުނިޔޭގެ އިގްތިސާދަށް ނުފޫޒު ފޯރުވާ ބޮޑު ކުންފުންޏެއްގެ އިސްވެރިޔާ ބަދަލުވުމަކީ، އިންވެސްޓަރުންނާއި ޓެކްނޮލޮޖީ ދާއިރާގެ އެންމެންގެ ސަމާލުކަން މިހާރު ހުއްޓިފައިވާ ކަމެކެވެ.
