މިފްކޯއިން ބޮޑުކަންނެލި ގަންނަން ފެށުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބޮޑުކަންނެލީގެ މަސްވެރިންނަށް ވެވަޑައިގެންފައިވާ ވަޢުދު ފުއްދެވުމުގެ މަސައްކަތުގެ ފެށުންކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ވަޒީރު މިހެން ވިދާޅުވީ، ކަނޑުއޮތްގިރީގައި މިފްކޯއިން ބޮޑުކަންނެލި ގަތުމުގެ އޮޕަރޭޝަން ރަސްމީކޮށް ފެށުމާ ގުޅިގެން މީޑިއާތަކަށް ދެއްވި ބަސްދީގަތުމެއްގައެވެ. މި މަސައްކަތް ފެށުމާއެކު، ބޮޑުކަންނެލީގެ މަސްވެރިން މިހާތަނަށް ތަޙައްމަލު ކުރަމުންދިޔަ ދަތިތަކަށް ޙައްލެއް ލިބިގެންދާނެކަން ވަޒީރު ފާހަގަކުރެއްވިއެވެ.
ވަޒީރު ޝިޔާމް ވިދާޅުވީ، މީގެ ކުރިން ސަރުކާރުން ބޮޑުކަންނެލި ގަނެފައިނުވާތީ މަސްވެރިން ވަރަށް އުނދަގޫ ހާލަތެއްގައި އުޅެންޖެހުނު ކަމަށެވެ. އަދި ރައީސުލްޖުމްހޫރިއްޔާގެ ވަޢުދުފުޅުތަކުގެ ތެރޭގައި ކަޅުބިލަމަހުގެ މަސްވެރިންނާއި، ބޮޑުކަންނެލީގެ މަސްވެރިންގެ އިތުރުން ފަރުމަސްވެރިންނަށްވެސް ގިނަ ކަންތައްތަކެއް ހިމެނިފައިވާކަން އެމަނިކުފާނު ފާހަގަކުރެއްވިއެވެ.
”ބޮޑު ކަންނެލި މަސްވެރިންނަށް ވެފައިވާ ވަޢުދުތައް ހާސިލްވެގެން މިދަނީ. މިއީ އިރާދަކުރެއްވިއްޔާ ވަރަށް ރަނގަޅު ފެށުމެއް،“ ވަޒީރު
މިފްކޯއިން ބޮޑުކަންނެލި ގަންނަން ފެށުމުގެ ކުރިން މަސްވެރިން މަސް ވިއްކަމުން ދިޔައީ އަމިއްލަ ކުންފުނިތަކަށެވެ. ނަމަވެސް، މަސް ވިއްކުމަށްފަހު ފައިސާ ލިބުން ލަސްވުމާއި، ބިލްތަކަށް ފައިސާ ނުލިބި ގިނަ ދުވަސްވުމުގެ ސަބަބުން މަސްވެރިންނަށް ބޮޑެތި ގެއްލުންތަކެއް ލިބެމުންދިޔައެވެ. ވަޒީރު ވިދާޅުވީ، ސަރުކާރުގެ މި އޮޕަރޭޝަނަކީ ދެމެހެއްޓެނިވި ގޮތެއްގައި ކުރިއަށް ގެންދެވޭނެ އިންތިޒާމުތަކާއެކު ފެށި މަސައްކަތެއް ކަމަށެވެ.
މީގެ އިތުރުން، މަސްވެރިކަމަކީ ރާއްޖޭގެ އިޖުތިމާޢީ ފޭރާމާ ގުޅިފައިވާ ސިނާޢަތަކަށްވާއިރު، ރައްޔިތުންނަށް ގެއްލުންވާ ކޮންމެ ކަމެއްގައި ސަރުކާރުން ފިޔަވަޅު އަޅާނެ ކަމުގެ ޔަޤީންކަން ވަޒީރު ދެއްވިއެވެ. އަދި ދުނިޔޭގެ އެހެން ޤައުމުތަކުގައިވެސް އަމިއްލަ އުފެއްދުންތެރިކަމުގެ ސިނާޢަތްތަކަށް ސަރުކާރުން އެހީތެރިވާ ފަދައިން، ރާއްޖޭގެ މަސްވެރިކަމުގެ ދާއިރާގައި ހަރަކާތްތެރިވާ ހުރިހާ މަސްވެރިންގެ މަސްލަހަތު ހިމާޔަތްކުރުމުގައި ސަރުކާރު ދެމިއޮންނާނެ ކަމަށްވެސް ވަޒީރު ޝިޔާމް ވިދާޅުވިއެވެ.
