ސްޓޭޓް އިލެކްޓްރިކް ކޮމްޕެނީ (ސްޓެލްކޯ) ގެ މެނޭޖިން ޑިރެކްޓަރުގެ މަގާމުން އަހްމަދު ޝަމާހު މިއަދު ވަކިކުރުމާ ގުޅިގެން، އެ ކުންފުނީގެ ޕްރޮކިއުމަންޓް ޑިޕާޓްމަންޓްގެ ޖެނެރަލް މެނޭޖަރު އަޒްހަދު ރަމީޒު ވެސް މަގާމުން ދުރުކޮށްފިއެވެ.
އެނގިފައިވާ ގޮތުގައި އަޒްހަދު މަގާމުން ދުރުކޮށްފައިވަނީ، ޝަމާހު ވަކިކުރުމާ ގުޅިގެން ކުންފުނި ހިންގުން ވަގުތީ ގޮތުން ޑެޕިއުޓީ މެނޭޖިން ޑިރެކްޓަރު ޑރ. އަލީ އަޒްވާރާ ހަވާލުކޮށްފައި ވަނިކޮށެވެ. މަގާމުން ދުރުކުރި ނަމަވެސް، އަޒްހަދު އަދި ސްޓެލްކޯގެ ވަޒީފާއަކުން ވަތްކެއް ނުކުރެއެވެ.
މި ބަދަލުތައް އައިސްފައި މިވަނީ ޝަމާހު ކަމަށް ބުނާ މީހަކު ވާހަކަދައްކާ އޯޑިއޯއެއް ސޯޝަލް މީޑިއާގައި ލީކުވެފައިވާ ދަނޑިވަޅެއްގައެވެ. އެ އޯޑިއޯގައި ބުނާ ގޮތުން، ކުންފުނީގެ އެތެރޭގައި ޝަމާހު ކުރަން އުޅުނު ކަންތައްތައް އެނގޭނީ ޖީއެމް އަޒްހަދަށާއި އިތުރު މީހަކަށެވެ. ނަމަވެސް އެ އޯޑިއޯއާ ގުޅިގެން ޝަމާހު ވިދާޅުވީ އެއީ އޭނާގެ އަގު ވައްޓާލަން އުފައްދާފައިވާ ”ފޭކު“ ނުވަތަ ފެބްރިކޭޓެޑް އޯޑިއޯއެއް ކަމަށެވެ.
ބެލެވޭ ގޮތުގައި މި ދެ ބޭފުޅުންނާ މެދު ފިޔަވަޅު އަޅާފައިވަނީ ކޮރަޕްޝަންގެ ތުހުމަތުތަކަކާ ގުޅިގެންނެވެ.
ޕްރައިވަޓައިޒޭޝަން އެންޑް ކޯޕަރައިޓައިޒޭޝަން ބޯޑު (ޕީސީބީ) އިން ޝަމާހު މަގާމުން ވަކިކުރިކަން ކަށަވަރުކޮށްދިން ނަމަވެސް، އެކަމުގެ ތަފްސީލީ ސަބަބެއް ހާމައެއް ނުކުރެއެވެ. ޝަމާހު ސްޓެލްކޯގެ އެމްޑީ ކަމަށް އައްޔަންކުރީ މިދިޔަ ސެޕްޓެމްބަރު މަހުގެ 8 ވަނަ ދުވަހުއެވެ.
މީގެ ކުރިން މި ސަރުކާރުގައި ޝަމާހު ވަނީ މިފްކޯގެ ސީއީއޯގެ މަގާމު ވެސް ފުރުއްވާފައެވެ. އެ މަގާމުގައި ހުންނެވި އިރު ކޯޕަރޭޓް ގަވަނެންސްއާ ގުޅޭ މައްސަލަތަކެއްގައި ދެ ފަހަރެއްގެ މަތިން ސަސްޕެންޑް ކުރުމަށްފަހު، މިދިޔަ މެއި މަހުގެ 21 ގައި އޭނާ އެ މަގާމުން ވަކިކުރިއެވެ. އޭގެ ފަހުން ޝަމާހު ހުންނެވީ ފިޝަރީޒް މިނިސްޓްރީގެ ސްޓޭޓް މިނިސްޓަރުގެ މަގާމުގައެވެ.
