ދުނިޔޭގެ ބިލިއަނަރުންގެ ޖުމްލަ މުއްސަނދިކަން 2025 ވަނަ އަހަރާ ހަމައަށް 18.3 ޓްރިލިއަން ޑޮލަރަށް އަރާފައިވާ ކަމަށާއި، މިއީ އޭގެ ކުރީ އަހަރާ އަޅާބަލާއިރު 16 އިންސައްތައިގެ ކުރިއެރުމެއް ކަމަށް އޮކްސްފޭމް އިންޓަނޭޝަނަލުން ހާމަކޮށްފިއެވެ. ވޯލްޑް އިކޮނޮމިކް ފޯރަމް ގެ ބައްދަލުވުންތަކާ ދިމާކޮށް ނެރުނު މި ރިޕޯޓުގައިވާ ގޮތުން، 2020 ވަނަ އަހަރާ އަޅާބަލާއިރު މިއީ 81 އިންސައްތައިގެ ބޮޑު އިތުރުވުމެކެވެ.
މި ރިޕޯޓުގައި ފާހަގަކޮށްފައިވާ ގޮތުގައި، މުއްސަނދިންގެ މިލްކިއްޔާތު އިތުރުވަމުންދާ ވަރަކަށް އާންމު ރައްޔިތުންނާއި މުއްސަނދިންގެ ދެމެދުގައި އޮތް ފަރަގު ދަނީ އިންތިހާއަށް ބޮޑުވަމުންނެވެ. ދުނިޔޭގެ ކޮންމެ ހަތަރު މީހަކުން އެކަކަށް ދެއިރުގެ ކެއުން ހޯދުމަށް ދަތިވެފައިވާއިރު، ދުނިޔޭގެ އާބާދީގެ ދެބައިކުޅަ އެއްބައި މީހުން ދިރިއުޅެމުންދަނީ ފަގީރުކަމުގެ ތެރޭގައެވެ. އޮކްސްފޭމުން ބުނާ ގޮތުގައި، ބިލިއަނަރުން ސިޔާސީ މައިދާނަށް ވަނުމުގެ ފުރުސަތު އާންމު މީހަކަށްވުރެ 4،000 ގުނަ އިތުރެވެ.
އޮކްސްފޭމްގެ އެގްޒެކެޓިވް ޑައިރެކްޓަރ އަމީތާބް ބެހާރު ވިދާޅުވި ގޮތުގައި، މުއްސަނދިންނާއި އެހެން މީހުންގެ ދެމެދުގައި އޮތް ފަރަގަކީ ހަމައެކަނި އިގްތިސާދީ ފަރަގެއް ނޫނެވެ. މީގެ ސަބަބުން ސިޔާސީ ނުފޫޒުތައް ވަކި ބައެއްގެ އަތްމައްޗަށް ގޮސް، މުއްސަނދިންނަށް ފައިދާވާ ގޮތަށް ޓެކްސް ކުޑަކުރުމާއި، ބޮޑެތި ކުންފުނިތަކުގެ މައްޗަށް އޮންނަ ކޮންޓްރޯލްތައް ކުޑަވުމުގެ ބިރު އެބައޮތެވެ.
މި މުއްސަނދިކަން އިތުރުވުމަށް ދިމާވި ސަބަބުތަކުގެ ތެރޭގައި ސަރުކާރުތަކުގެ ސިޔާސަތުތަކާއި، ޓެކްސް ކުޑަކުރުމާއި، އާޓިފިޝަލް އިންޓެލިޖެންސް ފަދަ ޓެކްނޮލޮޖީގެ ކުރިއެރުންތައް ހިމެނެއެވެ. މިކަމަށް ހައްލެއް ހޯދުމަށްޓަކައި މުއްސަނދިންގެ އަތުން ’ވެލްތު ޓެކްސް‘ ނެގުމަށް އޮކްސްފޭމުން ވަނީ ގޮވާލާފައެވެ. ނޯވޭ ފަދަ ގައުމުތަކުގައި މިހާރުވެސް މިފަދަ ޓެކްސްއެއް ނަގަމުންދާއިރު، އިނގިރޭސިވިލާތާއި ފްރާންސް އަދި އިޓަލީ ފަދަ ގައުމުތަކުންވެސް މިކަމާ މެދު ދަނީ ވިސްނަމުންނެވެ.
ތަފާސްހިސާބުތަކުން ދައްކާ ގޮތުގައި، ނިމިދިޔަ އަހަރު ބިލިއަނަރުންގެ މިލްކިއްޔާތަށް އިތުރުވި 2.5 ޓްރިލިއަން ޑޮލަރަކީ ދުނިޔޭގެ އެންމެ ފަގީރު 4.1 ބިލިއަން މީހުންގެ ޖުމްލަ މުއްސަނދިކަމާ އެއްވަރުގެ އަދަދެކެވެ. 2025 ވަނަ އަހަރު ދުނިޔޭގެ ބިލިއަނަރުންގެ އަދަދު ފުރަތަމަ ފަހަރަށް 3,000 އިން މައްޗަށް ގޮސްފައިވާއިރު، 500 ބިލިއަން ޑޮލަރަށްވުރެ ގިނަ މިލްކިއްޔާތަކާއެކު ލިސްޓުގެ ކުރީގައި އުޅެނީ އީލޮން މަސްކެވެ.
މީގެ އިތުރުން، ދުނިޔޭގެ ބޮޑެތި މީޑިއާ ކުންފުނިތަކުގެ 50 އިންސައްތައަށްވުރެ ބޮޑު ބައެއް ކޮންޓްރޯލް ކުރަނީ ޖެފް ބޭޒޯސް އާއި އީލޮން މަސްކް ފަދަ މަދު ބިލިއަނަރުންތަކެއް ކަންވެސް މި ރިޕޯޓުގައި ވަނީ ފާހަގަކޮށްފައެވެ. މިއީ އިޖުތިމާއީ، އިގްތިސާދީ އަދި ސިޔާސީ ހަމަހަމަކަން ގެއްލިގެންދާނެ ކަމެއް ކަމަށް ބުނެ އޮކްސްފޭމުން ވަނީ ކަންބޮޑުވުން ފާޅުކޮށްފައެވެ.
