ޅ. ނައިފަރުގެ ބިން އިތުރުކުރުމަށް ސަރުކާރުން ކުރިއަށްގެންދާ ބިޔަ މަޝްރޫޢުގެ ދަށުން، މިހާތަނަށް 26 ހެކްޓަރަށްވުރެ ބޮޑު ސަރަޙައްދެއް ހިއްކާ ނިމިފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހާމަކޮށްފިއެވެ.
ނައިފަރަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރާއްޖޭގެ އެކި ސަރަޙައްދުތަކުގައި ޤާއިމުކުރުމަށް ނިންމާފައިވާ ’އަރބަން ސެންޓަރު‘ ތަކުގެ ތެރޭގައި ހިމެނޭ މުހިންމު ރަށެކެވެ. ރަށުގެ ތަރައްޤީއަށް ބޭނުންވާ ބިން ނެތުމުގެ ދަތިކަން ޙައްލުކުރުމަށްޓަކައި މިދިޔަ އަހަރުގެ އޮކްޓޫބަރު 28 ގައި ފެށި މި މަޝްރޫޢުގެ ދަށުން ޖުމްލަ 44.8 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ.
އެމްޓީސީސީން ވިދާޅުވީ، ވޭތުވެދިޔަ 5 މަސްދުވަހުގެ ތެރޭގައި އެކްސެލެރޭޓެޑް ސްޕީޑެއްގައި މަސައްކަތް ކުރިއަށް ގޮސް، މިހާތަނަށް 26.65 ހެކްޓަރުގެ ބިން ހިއްކާ ނިމިފައިވާ ކަމަށެވެ. އަދި ބާކީ އޮތް 18 ހެކްޓަރުގެ ބިން ހިއްކުމުގެ މަސައްކަތްވެސް ތާވަލާ އެއްގޮތަށް ކުރިއަށްދާ ކަމަށް އެ ކުންފުނިން ބުނެއެވެ.
ބިން ހިއްކުމުގެ އިތުރުން، ހިއްކާ ސަރަޙައްދު ޙިމާޔަތްކުރުމުގެ ގޮތުން ބޮޑު ހިލައިގެ ރިވެޓްމެންޓާއި، ބޭރު ތޮއްޓާއި، ގްރޮއިން ޖެހުމުގެ މަސައްކަތްވެސް މި މަޝްރޫޢުގެ ތެރޭގައި ހިމެނެއެވެ. އެގޮތުން 1813 މީޓަރުގެ ރިވެޓްމެންޓަކާއި، 803 މީޓަރުގެ ބޭރު ތޮއްޓެއްގެ އިތުރުން 474 މީޓަރުގެ ގްރޮއިން ޖެހުމަށް ވަނީ ނިންމާފައެވެ.
5800 އަށްވުރެ ބޮޑު އާބާދީއެއް އޮތް ނައިފަރުގެ މިހާރުގެ ބޮޑުމިނަކީ 55 ހެކްޓަރެވެ. މީގެކުރިން 2004 ވަނަ އަހަރުވެސް އެރަށުން 16 ހެކްޓަރުގެ ބިން ހިއްކާ، އެ ސަރަޙައްދުގައި ބޯހިޔާވަހިކަމުގެ މަޝްރޫޢުތައް ހިންގާފައިވެއެވެ. ސަރުކާރުގެ އަމާޒަކީ މިހާރު ކުރިއަށްދާ މަޝްރޫޢު ނިމުމުން، ނައިފަރަކީ ސަރަޙައްދީ ފެންވަރުގައި ތަރައްޤީވެފައިވާ، ހުރިހާ ޚިދުމަތްތަކެއް ފުރިހަމަވެފައިވާ އަރބަން ސެންޓަރަކަށް ހެދުމެވެ.
މި މަޝްރޫޢަކީ 1 އަހަރާއި 9 މަސްދުވަހުގެ ތެރޭގައި ނިންމުމަށް އެމްޓީސީސީއާ ޙަވާލުކޮށްފައިވާ މަޝްރޫޢެކެވެ.
