ހުރިހާ ދިވެހިންވެސް ތިބީ ޤައުމީ ފުޓްސަލް ޓީމާއެކުކަމަށާއި، ރައްޔިތުން ތިބީ ޤައުމީ ޓީމުން ތަށްޓާއެކު އެނބުރި ރާއްޖެ އަންނާނެ ދުވަހެއްގެ އިންތިޒާރުގައިކަމަށް ރައީސުލްޖުމްހޫރިއްޔާގެ ނައިބު، އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.
ގދ. ފިޔޯރީއަށް ކުރެއްވި ޒިޔާރަތުގެ ތެރެއިން ”ޕީއެސްއެމް ނިއުސް“ އާ ވާހަކަފުޅުދައްކަވަމުން ނައިބު ރައީސް ވިދާޅުވީ، މުޅި ޤައުމު އޮތީ ޤައުމީ ޓީމާއެކުގައި ކަމަށާއި، އެހެން ފަހަރުތަކެކޭ ވެސް އެއްފަދައިން، ކުޅިވަރުގައި ދިވެހިން ދައްކައިދޭ އެއްބައިވަންތަކަމުގެ ރިވެތި ސިފަ މި ފަހަރުވެސް ފެނިގެންދާނެ ކަމަށެވެ.
މީގެ އިތުރުން ނައިބު ރައީސް ވަނީ، މުޅި ރާއްޖޭގައިވެސް، މީސްމީޑިއާގެ އެކި މަންސަތައް މެދުވެރިކޮށް ހުރިހާ ދިވެހިން ވެސް ޤައުމީ ޓީމާއެކު ތިބިކަން ހާމަކުރަމުންދާކަން ފާހަގަކުރައްވާފައެވެ. އަދި ދިވެހި ޓީމާއިމެދު ދިވެހިންގެ އުއްމީދުތައް ހުރި މިންވަރު އެކަމުން ހާމަވެގެންދާކަމަށް އެމަނިކުފާނު ވިދާޅުވިއެވެ.
ނައިބު ރައީސް ވިދާޅުވީ، ތަށްޓާއެކު ޤައުމީ ޓީމުން އެނބުރި ރާއްޖެ އަންނައިރު، ޓީމަށް މަރުޚަބާ ކިޔުމަށް ދިވެހިން ތިބީ ކެތްމަދުވެފައި ކަމަށެވެ.
”އަޅުގަނޑު ދަންނަވާލަން ބޭނުން ދިވެހި މުޅި ޤައުމު މިއޮތީ ދިވެހި ޤައުމީ ޓީމާއެކުގައޭ. އަބަދުވެސް ކުޅިވަރުގައި ދިވެހިން ދައްކައިދޭ ނަމޫނާ، މި އެއްބައިވަންތަކަމުގެ ރިވެތި ސިފަ، އިރާދަކުރެއްވިޔާ މިފަހަރު ވެސް އަޅުގަނޑުމެންގެ ރާއްޖެއިން ދައްކައިދޭނެ،“ ސާބިތުކަމާއެކު ކުޅެ، ޤައުމަށް ރީތި ނަން ހޯދައިދިނުމަށް ޓީމުގެ ކިބައިން އެދިވަޑައިގަންނަވަމުން ނައިބު ރައީސް ވިދާޅުވިއެވެ.
ފުރަތަމަ ފަހަރަށް ބާއްވާ ސާފް ފުޓްސަލް ޗެމްޕިއަންޝިޕްގެ ތަށްޓާއެކު ޤައުމީ ޓީމުން އެނބުރި ރާއްޖެ އަންނާނެ ދުވަހެއްގެ އިންތިޒާރުގައި މުޅި ޤައުމު އޮތްއިރު، މުބާރާތުގެ ޗެމްޕިއަންކަން ކަށަވަރުކުރަން ރާއްޖެއަށް ދެން އޮތް ދެމެޗުގެ ތެރެއިން ބޭނުންވަނީ އެންމެ މެޗަކުން މޮޅުވާށެވެ. އެގޮތުން، ހޮނިހިރު ދުވަހު ބޫޓާނާ ދެކޮޅަށް ކުޅޭ މެޗުން މޮޅުވެއްޖެނަމަ ރާއްޖެއަށް މުބާރާތުގެ ތަށި ކަށަވަރުވާނެއެވެ.
