އަންނަ ފެބްރުއަރީ މަހުގެ ތެރޭގައި ރާއްޖޭގެ އިތުރު އަތޮޅަކަށް ”ރާއްޖެ ޓްރާންސްޕޯޓް ލިންކް“ (އާރްޓީއެލް) ފެރީގެ ޚިދުމަތް ފެށުމަށް ތައްޔާރުވަމުން އަންނަ ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ހާމަކުރައްވައިފިއެވެ.
މުޅި ރާއްޖެ ހައި ސްޕީޑް ފެރީ ނިޒާމަކުން ގުޅާލުމަށް ފަށާފައިވާ މި ބިޔަ މަޝްރޫޢުގެ ދަށުން، ޚިދުމަތް ދެމުންދަނީ ޖުމުލަ 6 ޒޯނަކަށް ބަހާލައިގެންނެވެ. މީގެ ތެރެއިން 4 ޒޯނެއްގައި މިހާތަނަށް ޚިދުމަތް ފަށާފައިވާއިރު، ޖުމުލަ 12 އަތޮޅެއް މި ނިޒާމުން ވަނީ ގުޅާލެވިފައެވެ. އެންމެ ފަހުން މި ޚިދުމަތް ތަޢާރަފުކޮށްފައިވަނީ ތ. އަތޮޅުގައެވެ.
ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން މަޢުލޫމާތު ދެއްވި ގޮތުގައި، ދެން އެންމެ އަވަހަށް ޚިދުމަތް ފަށާނެ އަތޮޅުތައް ކަނޑައެޅުމުގެ މަސައްކަތް މިހާރު ދަނީ ކުރަމުންނެވެ. މިހާތަނަށް ޚިދުމަތް ނުފެށި އޮތީ ޒޯން 3 އަދި ޒޯން 4 ގައެވެ. ޒޯން 3 ގައި ހިމެނެނީ ކ، އއ، އދ އަދި ވ. އަތޮޅެވެ. ޒޯން 4 ގައި ހިމެނެނީ މ، ފ، ދ އަދި ލ. އަތޮޅެވެ.
މި ޚިދުމަތް ދިނުމަށް ސަރުކާރުން ހަވާލުކޮށްފައިވަނީ އެމްޓީސީސީއާއެވެ. އެ ކުންފުނިން ވިދާޅުވީ، ބާކީ ހުރި އަތޮޅުތަކަށް ޚިދުމަތް ދިނުމަށް ބޭނުންވާ ފެރީތައް ބަނުމުގެ މަސައްކަތް ބާރުދުވެލީގައި ކުރިއަށްދާ ކަމަށެވެ. އަދި ތާވަލާ އެއްގޮތަށް ފެރީތައް ނިމެމުންދާ ވަރަކަށް، އަތޮޅުތަކަށް ޚިދުމަތް ފުޅާކުރަމުންދާނެ ކަމަށްވެސް އެމްޓީސީސީން ބުނެއެވެ.
2022 ވަނަ އަހަރު ފެށި އާރްޓީއެލްގެ ޚިދުމަތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުންވެސް ޚާއްޞަ އިސްކަމެއް ދީގެން ކުރިއަށްގެންދާ މަސައްކަތެކެވެ. ރައީސުލްޖުމްހޫރިއްޔާ މިދިޔަ އޮކްޓޯބަރު މަހު އަތޮޅުތަކަށް ކުރެއްވި ދަތުރުފުޅުގައި ވިދާޅުވެފައިވަނީ، އަންނަ މާރިޗު މަހުގެ ނިޔަލަށް ރާއްޖޭގެ ހުރިހާ އަތޮޅަކަށް މި ޚިދުމަތް ފޯރުކޮށްދިނުމަކީ ސަރުކާރުގެ އަމާޒެއް ކަމަށެވެ.
އާރްޓީއެލް ފެރީގެ ނިޒާމަކީ ރައްޔިތުންނަށް އަގުހެޔޮކޮށް، އިތުބާރާއެކު ދަތުރުފަތުރު ކުރެވޭނެ މަގު ފަހިކޮށްދިނުމަށް ޤާއިމުކުރަމުންދާ، ރައްޔިތުންގެ ބޮޑު ތަރުޙީބެއް ލިބިފައިވާ ޚިދުމަތެކެވެ.
