އިންޑިއާގެ ވެސްޓް ބެންގޯލް ސަރަހައްދުގައި ނިޕާ ވައިރަސް ފެތުރެމުންދާތީ، އެ ސަރަހައްދަށް ދަތުރުކުރާ ދިވެހިން ސަމާލުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.
އެޗްޕީއޭއިން މިކަމާ ގުޅޭގޮތުން ނެރުނު ބަޔާނެއްގައި ވިދާޅުވީ، މި ހިނގާ ޖެނުއަރީ މަހުގެ ތެރޭގައި ވެސްޓް ބެންގޯލްއިން ނިޕާ ވައިރަސްގެ ތިން ކޭހެއް ފެނިފައިވާ ކަމަށެވެ. އަދި މި ބައްޔަށް ޕޮޒިޓިވްވި މީހުންނާ ގުޅުންހުރި 180 އަށްވުރެ ގިނަ މީހުން ކޮންޓެކްޓުންގެ ގޮތުގައި ފާހަގަކުރެވި، މިހާރު ކަރަންޓީނުކޮށްފައިވާ ކަމަށްވެސް އެ އެޖެންސީން މައުލޫމާތު ދެއްވައެވެ.
ރާއްޖޭގެ ސިއްހީ ކަންކަން ބަލަހައްޓާ އެންމެ މަތީ އިދާރާއިން ވިދާޅުވި ގޮތުގައި، މިވަގުތު ރާއްޖެއަށް މި ބަލީގެ ނުރައްކާ އޮތް މިންވަރު ކުޑައެވެ. ނަމަވެސް އިންޑިއާގެ ހާލަތު އެ އެޖެންސީން މޮނިޓަރ ކުރަމުންދާ ކަމަށާއި، ޚާއްޞަކޮށް ވެސްޓް ބެންގޯލަށް ދަތުރުކުރާ ފަރާތްތަކުން މިކަމަށް ޚާއްޞަ ސަމާލުކަމެއް ދިނުމަކީ މުހިންމު ކަމެއް ކަމުގައި އެޗްޕީއޭއިން ފާހަގަކުރައްވައެވެ.
ނިޕާ ވައިރަސްއަކީ ޓެރޯޕަސް އާއިލާގެ ވާލުންނާއި އޫރުން އިންސާނުންނަށް ފެތުރޭ ނުރައްކާތެރި ބައްޔެކެވެ. މި ބަލީގެ އަލާމާތްތަކުގެ ތެރޭގައި ހުން އައުމާއި، ބޮލުގައި ރިއްސުމާއި، ކެއްސުމާއި، ކަރުގައި ރިއްސުމުގެ އިތުރުން ނޭވާލާން އުނދަގޫވުން ހިމެނެއެވެ. އަދި ބަލި ބޮޑުވާ ހާލަތްތަކުގައި ސިކުނޑިއަށް އަސަރުކޮށް، ވާނުވާ ނޭނގުމާއި ފިޓުޖެހުން ފަދަ ނުރައްކާތެރި ކަންކަން މެދުވެރިވާ ކަމަށް އެޗްޕީއޭއިން ވިދާޅުވިއެވެ.
އެޗްޕީއޭއިން އިތުރަށް ވިދާޅުވީ، މި ބަލި ޖެހުމުން ބައެއް ފަހަރު އެއްވެސް އަލާމާތެއް ނުފެނިވެސް ހިނގައިދާނެ ކަމަށެވެ. އަދި މި ބައްޔަށް ވަކި ޚާއްޞަ ފަރުވާއެއް ނެތް ނަމަވެސް، ބަލީގެ އަލާމާތްތަކަށް ފަރުވާ ކުރެވޭނެ ކަމަށް އެ އިދާރާއިން މައުލޫމާތު ދެއްވައެވެ.
މިހާތަނަށް އިންޑިއާގެ އެހެން އެއްވެސް ސަރަހައްދަކުން ނުވަތަ އެހެން ގައުމަކުންވެސް މި ބަލި ފެނިފައިވާ ކަމުގެ ރިޕޯޓެއް ލިބިފައިނުވާ ކަމަށާއި، ރާއްޖެއިންވެސް މި ބަލީގެ އެއްވެސް ކޭސްއެއް ނުވަތަ ކޮންޓެކްޓެއް މިހާތަނަށް ރިޕޯޓްކޮށްފައިނުވާ ކަމަށް އެޗްޕީއޭގެ ބަޔާނުގައި ބަޔާންކޮށްފައިވެއެވެ.
