އަހަރުގެ ކޮންމެ ދުވަސްވަރެއްގައި ވެސް އުމްރާގެ މަތިވެރި އަޅުކަން އަދާކުރުމުގެ ފުރުސަތު ދިވެހިންނަށް ފަހިކޮށްދިނުމުގެ ގޮތުން، މޯލްޑިވްސް ހައްޖު ކޯޕަރޭޝަނުން ”ކުރު އުމްރާ“ ގެ ނަމުގައި ހާއްސަ ޕެކޭޖެއް ތައާރަފުކޮށްފި އެވެ.
ހައްޖު ކޯޕަރޭޝަނުން ހާމަކޮށްފައިވާ ގޮތުގައި، މި ޕެކޭޖަކީ ހައްޖު މޫސުން ފިޔަވައި އަހަރުގެ އެހެން ކޮންމެ ދުވަސްވަރެއްގައި ވެސް އުމްރާ ކުރެވޭނެ ގޮތަށް ފަރުމާކޮށްފައިވާ ޕެކޭޖެކެވެ. މިއީ ބިޒީކޮށް އުޅޭ މީހުންނަށް ލިބޭ ކުރު ޗުއްޓީއެއްގައި ނުވަތަ އާއިލާ އާއި ރަހުމަތްތެރިންނާއެކު އަމިއްލަ އަށް އިންތިޒާމުތައް ހަމަޖައްސައިގެން އުމްރާ ކުރަން ބޭނުންވާ ފަރާތްތަކަށް ހުޅުވާލި ރަނގަޅު ފުރުސަތެކެވެ.
މި ޕެކޭޖުގެ އެންމެ ހާއްސަ ސިފައަކީ އުމްރާވެރިޔާ ބޭނުންވާ ގޮތަށް ހުރިހާ އިންތިޒާމެއް އިހުތިޔާރު ކުރުމުގެ ފުރުސަތު ލިބިގެންދިއުމެވެ. އެގޮތުން އުމްރާ އަށް ފުރާނެ ދުވަހާއި، އެނބުރި އަންނާނެ ދުވަހާއި، ދަތުރުކުރާނެ ފްލައިޓާއި، ހުންނާނެ ހޮޓަލުގެ އިތުރުން ސައުދީގައި ދަތުރުފަތުރު ކުރާނެ އުޅަނދުތައް ވެސް އަމިއްލައަށް ކަނޑައެޅޭނެ އެވެ.
ޕެކޭޖުގެ މުހިންމު ބައިތައް:
ވިޔަފާރި ދަތުރުތަކާ ގުޅުވުން: ވިޔަފާރި ދަތުރުތަކަށް ފަހު އުމްރާ ކުރަން ބޭނުންވާ ފަރާތްތަކަށް ހާއްސަ އިންތިޒާމުތަކެއް ވަނީ ހަމަޖައްސާފަ އެވެ. މީގެ ތެރޭގައި އުމްރާއަށް ފަހު ދުބާއީ ފަދަ ގައުމުތަކަށް ވިޔަފާރިކުރަން ދިއުމަށް ބޭނުންވާ ވިސާގެ ކަންކަން ހަމަޖައްސައިދިނުން ހިމެނެ އެވެ.
- ފްލައިޓާއި ހޮޓާ އިހުތިޔާރުކުރުން: ދަތުރުކުރާނެ އެއާލައިނަކާއި ފްލައިޓް ކްލާސްގެ އިތުރުން، ސައުދީގައި ހުންނާނެ ހޮޓަލުގެ ފެންވަރާއި ހޮޓާ ހުންނަ ސަރަހައްދު އަމިއްލައަށް ކަނޑައެޅޭނެ އެވެ.
- ދަތުރުފަތުރުގެ އިންތިޒާމު: ކޮންމެ މީހެއްގެ ވެސް ބަޖެޓާ ގުޅޭ ފެންވަރުގެ އުޅަނދުތަކުގައި ސައުދީގައި ދަތުރުކުރުމުގެ ފުރުސަތު ލިބިގެންދާނެ އެވެ.
- ޒިޔާރަތްތައް: ގްރޫޕަކާ ނުގުޅި އަމިއްލައަށް ބޭނުންވާ ތަންތަނަށް ޒިޔާރަތްކުރުމާއި، އެންމެ ފަސޭހަ ގަޑިތަކުގައި އަޅުކަން އަދާކުރުމުގެ ފުރުސަތު ލިބޭނެ އެވެ.އެކަނި ނުވަތަ ގްރޫޕަކާއެކު: އެކަނި އުމްރާ ކުރަން ބޭނުންވާ މީހުންނަށާއި، އާއިލާ ނުވަތަ ރަހުމަތްތެރިންގެ ވަކި ގްރޫޕެއްގެ ގޮތުގައި ދަތުރުކުރަން ބޭނުންވާ ފަރާތްތަކަށް ވެސް މި ޕެކޭޖުގެ ދަށުން އިންތިޒާމުތައް ހަމަޖައްސައިދެވޭނެ އެވެ.
ހައްޖު ކޯޕަރޭޝަނުން ބުނީ މި ޕެކޭޖުގެ ދަށުން އުމްރާވެރިޔާ އިހުތިޔާރު ކުރާ ހިދުމަތްތަކަށް ފައިސާ ދެއްކުމުގެ ފުރުސަތު އޮންނާނެ ކަމަށެވެ. އަދި އުމްރާއަށް ދާން ގަސްދުކުރާ ހިސާބުން ފެށިގެން ދަތުރު ނިމެންދެން ބޭނުންވާ ހުރިހާ އިރުޝާދަކާއި، ފަންނީ އެހީތެރިކަމާއި ލަފާ އެ ކޯޕަރޭޝަނުން ފޯރުކޮށްދޭނެ ކަމަށް ވެސް ބުނެފައިވެ އެވެ.
